Angajoqqaanut misiliutigineqartartut nalunaarusiap apeqquserpai

Meeqqat angerlarsimaffiup avataanut inissinneqassatillugit angajoqqaat psykologimit nalilersortinneqaraangata, takussutissaqanngilaq psykologimik kalaallimik misiliisitsisoqartarnersoq. Angajoqqaat piginnaasaannik nalilersuinerit apeqquserneqarnerat nalunaarusiap ilalerpaa.

VIVE meeqqat kalaallinik angajoqqaallit Danmarkimi angerlarsimaffiup avataanut inissinneqarsimasut pillugit misissuigami, kalaallit angajoqqaajusut piginnaasaannik misissuisartunik psykologinik kalaaliusunik atuisoqartarneranik naammattoorsinngilaq.

Danmarkimi kommunini sullissisut psykologinik kalaallinik, misissuutinik atuisinnaasunik aamma ilisimasaqanngitsut, nalunaarusiami nassuiarneqarpoq.

- Meeqqat kalaallinik angajoqqaaqartut angerlarsimaffimmut inissinneqarnissaannut suliani angajoqqaat piginnaasaannik misisissueriiatsit arlaleriarlutik apeqquserneqartarput. Nalilersuinermi psykologit nalilersuisuusut qallunaajusarput, misissuutillu kalaallinut, kalaallisut oqaatsinut kulturimullu naleqqussarsimaneq ajormata, apeqquserneqartarput, nalunaarusiami allassimavoq.

Danskit psykologiinut naammagittaalliortarfiup erseqqissarpaa isornartorsiuineq ilaatigut ilalerlugu, angajoqqaat kulturikkut tunuliaqutaat nalilersuinermi ilaatinneqartussaasariaqarmat.

Anaanat arlallit oqaluttuartut

P1 Morgenimi anaanat pingasut angajoqqaatut piginnaasat pillugit nalilersorneqarnerminni misigisaminnik oqaluttuarput. Tatigineqannginneq, paatsoorneqarneq misissuutillu paasiuminaatsinneri ilaatigut oqaluttuarineqarput.

Nalilersuinermi misiliutini allat misigissusaannik paasinninnissinnaaneq, misigittartuuneq, ilutsinik ilisarsisinnaassuseq oqaatsinillu paasinnissinnaassuseq misissorneqartarput. Misissuutilli danskit pissusaannut nalinginnaasunut tulluarsangaapput.

Angajoqqaat piginnaasaannik misissuineq ukuninnga imaqakkajuppoq:

  • Angajoqqaat meeqqamut ernumagineqartumut angajoqqaajunerannik nakkutilliineq
  • Qatanngutaasut angajulliit pillugit sulianik nassuiaatit, taakku aamma angerlarsimaffiup avataanut inissinneqarnissamut innersuunneqareersimappata
  • Meeqqat angajulliusut angerlarsimaffiup avataanut inissinneqarsimasunut angajoqqaat pissusilersuutaat
  • Angajoqqaat atorfii, ineqarnerat, tarnikkut timikkullu peqqissusaat nassuiarneqartarpoq, aanngajaarniutinillu atuisuunersut aamma nassuiarneqartarluni
  • Angajoqqaat peroriartornerannut tunngatillugu oqaloqatigiinnerit, angajoqqaatullu qanoq takorluugaqarnersut pillugit oqaloqatiginninnerit
  • Angajoqqaat eqqarsartaatsimikkut misigissutsimikkullu piginnaasaannik misilittaaneq

Nuuttut kommunip ataaniilersartut

Nalunaarusiami nassuiarneqarpoq angajoqqaat nunatsinnit Danmarkimut nuutsillugit, meeqqat ernummatigineqarlutik nalunaarutigineqaraangata imaluunniit angajoqqaajusut namminneerlutik ikioqqullutik saaffiginnikkaangasa qanoq pisoqartarnersoq.

- Meeraq ukiuni arlalinni angajoqqaamineereersimalluni angerlarsimaffiup avataanut inissinneqarsimanerani suliat misissorneranni takuneqarsinnaavoq angerlarsimaffiup avataanut inissinneqalinnginnermi meeraq angajoqqaanilu Kalaallit Nunaanniit Danmarkimut nuussimasartut. Suliat ilaanni aalajangersimasumik najugaqalernissaq anguneqarsimasanngilaq.

Suliani taama ittuni kommunip ilaqutariit tunuliaqutaannik ilisimasaqanngivissorsinnaanera erseqqissarneqarpoq.

Powered by Labrador CMS