Anette Lings ACB-mi siulittaasutut tunuarpoq

Anette Lings Arctic Circle Businessimi siulersuisuini siulittaasutut tunuarniarluni aalajangerpoq. Ilaasortatut ingerlaqqippoq, Sofie Frydenrejn Johansen siulittaasunngortoq.

Anette Lings imi ukiuni pingasuni siulittaasooreerluni siulersuisuini siulittaasutut tunuarpoq. Siulersuisuni ilaasortaaginnassaaq. Arctic Circle Business

Inuussutissarsiortut kattuffiat politikkikkut pituttorsimanngitsoq, Arctic Circle Business, 2. maj ukiumoortumik ileqquusumik ataatsimeersuarnermini siulittaasumik taarsiivoq. ACB tusagassiuutinut nalunaarummi taama ilisimatitsvoq.

Anette Lings siulersuisuni siulittaasutut tunuarpoq, Sofie Frydenrejn Johansen siulittaasunngorluni.

- Siulittaasutut qujarusuppunga immikkullu suleqatigisatsinnut ukiumut ataatsimut annertuumik tapersersorneqarnitsinnut tikilluaqqusaanitsinnillu. Ilaasortagullu qujaffigerujussuarusuppakka, - ilaasortaanissinnik Kalaallit Nunaanni inuussutissarsiornermut ineriartortitsisumut aaqqissuussamik pitsaanerpaamik tunngaviliinersi qulakkeerassiuk, Anette Lings ACB-p ukiumoortumik nalunaarutaani taama oqarpoq.

Periusissaq nutaaq saqqummiunneqartoq

Arctic Circle Business ataatsimeersuarnermi periusissamik nutaamik saqqummiussaqarpoq, qulequtaqartoq: Takorluugaq, Anguniagaq, Naleqartitat Siunertallu aamma saqqummiunneqarput. Qeqqata Kommunia Issittumi nunap immikkoortuani inuussutissarsiorfissatut pitsaanerpaanissaanik kissaateqartoq, periusissami nassuiarneqarpoq.

Periusissami immikkoortut arlallit nassuiarneqarput:

  • Anguniagaq A – Inuussutissarsiornerup pisortallu akornganni suleqatigiinneq nukittorsarlugu.
  • Anguniagaq B – Avammut tunisineq, imminut pilersorsinnaaneq aallartisaanerlu ineriartortitseqataaffigalugu.
  • Anguniagaq C – Sulinermut aammalu inuttut inuunermut tunngatillugu oqimaaqatigiissumik ingerlanissaannik tapersersuineq.
  • Naleqartitat – Pimoorussisoq, suliaminut ilisimaarinnittoq, piorsarsimassutsimut pinngortitamullu ataqqinnittoq,
  • Siunertaq – Nunap immikkoortua tamakkerlugu ilaasortaqarnissaq. Tunngaviliinissamut qulakkeerinnittussaammat, piviusunngortitsineq kiisalu nunap immikkoortuani inuiaqatigiinniit tunngaviusumit inuussutissarsiornermut ineriartortitsineq.

Siulersuisuni ilaasortaaginnartoq

Naak Anette Lings ukiuni pingasuni siulersuisuni siulittaasooreerluni tunuaraluarluni, siulersuisuni ilaasortaaginnassaaq.

Siulittaasoq nutaaq, Sofie Frydenrejn Johansen, maanna ACB-mi siulittaasunngortoq, ukiuni marlunni namminersortuuvoq illuliassanik titartaasartutut, suliffeqarfeqarluni Frydnrejn. Issittumilu sanaartorneq pillugu 2015-imiilli suliaqartarluni.

- Tulluusimaarutigaara nuannaarlungalu siulersuisunut siulittaasutut qinigaaninnut. Ukiuni kingullerni takorluugarput suliniuterpullu Arctic Circle Businessimi ersarissarsimavarput. Tamannalu nunap immikkoortuanut Kalaallit Nunaannullu inuussutissarsiornermut ineriartornermut tunngaviliineranut tulluarsoraara, siulittaasoq nutaaq oqarpoq, siulittaasutullu tatigineqarninin nuannaarutiginerarpaa.

Siulersuisut nutaat:

Sofie Frydenrejn Johansen siulersuisuni siulittaasunngorpoq, Henrik Sachse siulittaasumut tullersortaalluni. Magnus R. Elleby, Najannguaq D. Lennert, Jonas Nielsen aamma Anette Lings siulersuisuni ilaasortaapput, Søren Damgaard Royal Greenlandimeersoq sinniisunngortoq.

Powered by Labrador CMS