Ane Lone Bagger: Avalammut tapiissutit amerlineqarsimanerat utaqqiisaarutaannaavoq
Avalammut tapiiissutit 2016-imi amerlineqarnerat piffissami aalajangersimasuinnarmi atuuttussaasoq, ilinniartitaanermnut naalakkersuisoq Ane Lone Bagger isumaqarpoq.
Naalakkersuisoqatigiit aamma Demokraatit ukioq manna kissaataat aningaasaliiffiginiarlugit, aningaasanut inatsisip akuerineqangajalerneranni sipaarniarfissanik nassaartoqartariaqarsimavoq.
Avalammut tapiissutit 404.000 koruuninit 200.000 koruuninut appartinneqarnerisigut ilaatigut aningaasanik sipaarniartoqarpoq.
- Naalakkersuisoqatigiit aamma partiip tapertaasup anguniagaat aningaasalersorniarlugit, aningaasanut inatsisissap pingajussaaaneerneqarneranut sipaarniartussaavugut.
- Misissuinitsinni paasivarput, Avalak 2016-imi aningaasanut inatsimmi 204.000 koruuninik tapiiffigineqarnera qaffanneqarsimasoq, ilinniartitaanermut naalakkersuisoq, Ane Lone Bagger (S) nassuiaavoq.
- Saniatigut aningaasaliissutaasut piffissami naleqqussarnermi taamaallaat atuuttussaapput, taanna nangilluni oqarpoq.
Tulluarsaaneq pillugu paasissutissaqanngitsoq
Kisianni amerlineqarnerisa piffissami aalajangersimasuinnarmi atuunnissaa 2016-imut aningaasanut inatsimmi nassaariuminaarppoq.
- Tapiissutit qaffanneqarneri 2016-imi aningaasanut inatsimmut isumaqatigiissummut ilaapput. Saniatigut aningaasaliissuteqartoqarneratigut Kalaallit Nunaanni ilinniarnerup qaffasissusaata annertusarnissaanut Avalaap suliaqarnini ingerlateqqinnissaa kissaatigineqarpoq, aningaasanut inatsimmi oqaaseqaatini tamanna allaqqavoq.
Tapiissutit utaqqiisaarutaannaanissaat pillugu aningaasanut inatsimmut isumaqatigiissut paasissutissanik aamma imaqanngilaq.
Lottornermit tapiissutit
Avalak suliaminik ingerlatitseqqinnissaminut periarfissagissaartoq, Ane Lone Bagger isumaqarpoq, peqatigiiffik tapiissutinik allanik qinnuteqarsinnaammat.
Avalak tipsernermi aamma lottornermit tapiissutinik qinnuteqarnissaat kajumissaarutigissavara. Avalak siornatigut suliaminut tipsernermi lottornermit tapiissutinik 153.000 koruuninik pereernikuuvoq, tapiiffigineqaqqinnissaminnullu periarfissaqarluartut taamaammat nalilerpara.
Sipaarniartoqarnerata kingorna Avalak ukiumut 200.000 koruuninik ingerlatsinermut tapiiffigineqartassaaq. Kalaallit Nunaanni ilinniartut peqatigiiffiat, Ili Ili, 132.000 koruuninik tapiiffigineqartarpoq.