Ane Lone Bagger: Ataatsimiititaliaq ilisimatinneqareerpoq
Inatsisartuni nunanut allanut sillimaniarnermullu ataatsimiititaliaq amerikamiut mittarfinnut nutaanut sulianut soqutigisaqarnerat pillugu ilisimatinneqareerpoq. Nunanut allanut tunngasunut naalakkersuisoq, Ane Lone Bagger taama oqarpoq.
Nunanut allanut tunngasunut Naalakkersuisup, Ane Lone Baggerip (S), Mimi Karlsenip aamma Sofia Geislerip oqarnerat illuatungilerpaa. Taakku oqarput amerikamiut mittarfinnut nutaanut pingasunut aningaasaliinissamik soqutigisaqarnerat pillugu nunanut allanut sillimaniarnermullu ataatsimiititaliaq ilisimatinneqarsimanngitsoq.
Sermitsiaq.AG-mut naatsumik oqaaseqaateqarluni Ane Lone Bagger ilisimatitsivoq ataatsimiititaliaq ilisimatinneqareersimasoq.
- Erseqqissaatigissavara amerikamiut mittarfissanut sanaartortoqarnissaanut soqutiginninnerat, tamatumanilu sumiiffinnik takunnikkumallutik kissaateqarnerat, pillugit ataatsimiititaliaq ilisimatinneqarsimammat. Amerikamiullu septemberimi 2018-imi nalunaaruteqaqatigiinnermi tamanna pivoq, Ane Lone Bagger naatsumik nalunaaruteqarluni allappoq.
Amerikamiut soqutiginninnerat
Ataasinngormat paasinarsivoq mittarfinni nutaani pingasuni, Nuummiittumi, Ilulissaniittumi Qaqortumiittumilu aningaasaliinissamut periarfissat USA-p misissorai. Tamassumunngalu Kalaallit Nunaat piumasaqartuusimasoq.
IA-p Inatsisartuni nunanut allanut sillimaniarnermullu ataatsimiittialiami ilaasortaatitaat, siulittaasup tullia Mimi Karlsen aamma ilaasortaq Sofia Geisler, tamatuma kingorna tusagassiutinut nalunaaruteqarput, Naalakkersuisut ammanerusumik nalunaaruteqartarnissaat piumasaralugu.
KNR-ip paasissutissai naapertorlugit aappaagu februaarimi aalajangiisoqassaaq.
Nunanut allanut tunngasunut Naalakkersuisoq, Ane Lone Bagger (S), taamaattoq erseqqissaavoq aalajangiisoqalerneranik ilisimasaqarnani.
- Isumaqatigiilluni nalunaaruteqartoqareernerata kingorna amerikamiut aalajangiilerneranut tunngasumik ilisimasaqarnanga erseqqissaarusuppunga, allappoq.