Ane Lone Bagger naalakkersuisutut tunuarpoq
Ilinniartitaanermut, Kultureqarnermut Ilageeqarnermullu Naalakkersuisoq Ane Lone Bagger naalakkersuisuujunnaarusuppoq, tassungalu taarsiullugu peqqissutsini ilaquttanilu salliutinniarlugit.
Siumumi politikkerip tusagassiorfinnut nalunaaruteqarnermi ilisimatitsissutigaa, tunuarnissamik aalajangerniarneq oqimaassimasisoq, aalajangersimallunili "peqqissutsini ilaquttanilu salliutinniarlugit".
- Naalakkersuisutut ivertinneqarninnut tatigineqarnera qujassutigerusuppara politikikkullu suleqatigisimasakka aamma qujaffigerusuppakka. Minnerunngitsumik sulisut suleqatigisimasakka tamarluinnaasa qamannga pisumik qutsavigerusuppakka, tuagassiorfinnut nalunaarut naapertorlugu taamatut oqarpoq.
Naalakkersuisuuffigisai maanna Ineqarnermut Attaveqaqatigiinnermullu Naalakkersuisumit Karl Frederik Danielsenimit akisussaaffigineqarallassapput.
Naalakkersuisut Siulittaasuat Kim Kielsen Baggerip aalajangernera pillugu imatut oqaaseqarpoq:
- Ataqqivara Ane Lone-p peqqinnissani ilaquttanilu pillugit tunuarniuteqarluni aalajangiinera, naak naalakkersuisutut suleqatigiunnaarnissaa assut uggorigaluarlugu. Ane Lonemut oqarusuppunga qamannga pisumik qujanaq sullissilluarsimanernut, aammalu siunissami ajunnginnerpaanik kissaappakkit.
Ane Lone Bagger 2018-imi oktoberip tallimaanili Naalakkesuisutut atuussimavoq.