Ane Lone Bagger Issittoq pillugu periusissiamut tamat peqataatinneqarnissaannik kissaateqartoq
Nunanut allanut tunngasutigut Naalakkersuisoq isumaqarpoq, Kunngeqarfiup issittoq pillugu nutaamik periusissiorneranut qinikkat, inuussutissarsiortut, kommunit NGO-llu peqataatinneqassasut.
Kunngeqarfiup issittoq pillugu periusissiornissaa qinikkat martsip qaammataaa naanerani Ilulissani ataatsimiinneranni aallartinneqassaaq.
Tassunga atatillugu naalagaaffeqatigiinni pingasuusuni qinikkat qaaqquneqarsimapput.
Issittoq pillugu periusissiaq maanna atuuttoq ukioq manna atorunnaartussaavoq, 2011-meersuulluni. Taamanerniilli Issittumi pissutsit, naalagaaffiit pissaanilissuit soqutiginnikkiartuinnarnerisigut tunngavimmikkut allanngorsimaqaat.
- Issittumi ineriartornermi kiisalu Issittoq pillugu nunat tamalaat aaliangigaat, ajunngitsut ajortullu, kalaallit innuttaasuinut toqqaannartumik sunniuteqartarput. Nunanut allanut tunngasutigut Issittumut attuumassutillit sammisat pillugit inissisimaffipput tassaavoq Naalagaaffeqatigiinnermi illuatungeriiusugut amerlanertigut suleqatigiinnissatsinnut pisussaaffeqaratta, tassami taakku sammisat nunanut allanut ilaatigullu sillimaniarnermut tunngasutigut naalakkersuinermut attuumassuteqartarmata, Nunanut allanut tunngasutigut Naalakkersuisoq Ane Lone Bagger (S) tusagassiorfinnut nalunaaruteqarnermi oqarpoq.
Ataatsimiinnermut atatillugu ilisimatuut, inuussutissarsiortut, NGO-t kommunillu ataatsimeeqatigineqarnissamut qaaqquneqarsimapput.
- Taamaammat uagut – kalaallit – soqutigisavut periusissiassami salliutinneqarnissaasa qulakkeerneqarnissaat Naalakkersuisunit pingaartinneqarpoq. Tamanna tunngavigalugu Naalakkersuisunut pingaaruteqarpoq Issittumi inuusut sapinngisaq tamaat peqataatinneqarnissaasa qulakkeerneqarnissaa, Ane Lone Bagger oqarpoq.
Aamma innuttaasut apeqquteqarnissamut periarfissillugit ataatsimiitsinneqassapput.