Ane Hansenip kiffartuussinermut isumaqatigiissut kamaatigaa
Angallassinissamut kiffartuussinermut isumaqatigiissutip peqqinnissaqarfik, inuussutissarsiorneq aamma ingammik Qeqertarsuarmi innuttaasut eqqorpai, borgmesteri taama isumaqarpoq.
Qeqertarsuup Tunuani angallanermut kiffartuussinermut isumaqatigiissummut tunngatillugu ajornartorsiutit tulleriiaaginnavipput. Kommune Qeqertalimmi borgmesteri, Ane Hansen (IA), tusagassiuutinut nalunaarummi taama allappoq.
Qeqertarsuarmi peqqissaaviup kinguneri ilaatigut malugai.
- Qeqertarsuami peqqissaavimmi angallannerup kipiluttunarsinerani peqqissaavimmut nakorsaatit, pilattaanermilu atugassat kingusinaarunneqartarput, angallannermi assartuinermi kingullerpaatut angallassassanut inissinneqartaramik. Qeqertarsuarmi nakorsaatit Januarimi piniarneqarsimasut suli tikissimanngillat. Peqqissaavimmut suliartortoqartillugu nakorsaatit assigisaalu angallannermi kinguaattoortinneqartut suliartortunit pingaarnersiorlugit nassarneqartarput, tamannalu aqqutissaanngikkaluartoq borgmesterip tamanna oqaluttuaraa.
- Aaversinnermi aammik misissugassat Qeqertarsuamit Nuummut nassiunneqaraangamik arlaanni uninngatitaavallaarlutik misissugassaajunnaarlutik ajortittarput. Tamatuma kingunerisaanik innuttaasut arlaleriarlutik aaversittariaqartarput, tamannalu ajornartorsiuterujussuusartoq Susan Vignole Qeqertarsuup peqqissaaviani peqqissaasoq oqarpoq.
Naatitat oquttut
Inuussutissarsiortut aamma kingunerinik malugisaqarput, borgmesteri allappoq.
- Blue Water nunatsinni assartuisartut suliffeqarfiit ilagaat, Ilulissani immikkoortortaqarfiani inissisimasumi naatitat assartugassallu allat Qeqertarsuup Tunuani ingerlaqqittussat ukiuunerani angallanneri kinguaattooqattaaleraangata naatitat pallenut ilioqqakkat oquinnartut nassiussassallu allat uninngasuutigineqalertarput.
Nassiussat Qeqertarsuarmukartut Ilulissanit ingerlaqqinnaveertarput.
- Pissutsit ajorluinnartut iliuuseqarfiginissaannut aaqqiivigineqarnissaannullu akisussaasut immikkut iliuuseqartariaqalerput, Benedikte Mølgaard, illoqarfimmi pisortaq, Qeqertarsuaq, taama oqarpoq.
- Kommune Qeqertalik inuutissarsiornikkut, takornariaqarnikkut innuttaasunillu kiffartuussinermi siuariartuutaasunik suliniuteqarpoq, siuarsaaniarlunilu. Angallannermi pissutsit aporfiit annersarilerpaat tamannalu attanneqarsinnaangilaq, taama borgmester Ane Hansen (IA) naggasiivoq.