Skip to main content

Ane Hansen: Inunnik isumaginninneq aningaasaliiffigineqarnissaminik pisariaqartitsivoq

Kommune Qeqertalimmi borgmesterip Ane Hansenip (IA) Naalakkersuisut kommuninut aningaasaliinerunissaannik siunnersorpai. Aningaasat isumaginninnermut pingaartumillu meeqqanut atussapput.

Kim Kielsenip 2019 aammaarluni meeqqat ukiuattut taammagu, borgmester Ane Hansenip tamanna nuannaarutigaa, oqaatsilli kusanarluartut malitseqarnissaat amigaatigaa.

- Naalakkersuisut siulittaasuata ukioq 2019 ”Meeqqat ukioreqqissagaat” nalunaarutigimmagu borgmesteritut assut nuannaajallappunga. Taamatulli nalunaaruteqarneq aningaasaliissutinik iliuutsinillu malitseqartariaqarpoq, tusagassiutinut nalunaarummini allappoq.

Ane Hansenip nalunaarutaa naapertorlugu isumaginninnerup iluani unammilligassat arlallit kommunit suli naammassisinnaanngilaat. Taamaammat Naalakkersuisunik qaaqqusivoq, kommunit Naalakkersuisullu iluminni suleqatigiilluarnerunissaat anguniarlugu.

Kommunit peqataarusupput

Nuna tamakkerlugu meeqqat inuusuttullu pillugit iliuusissamik pilersaarusiortoqarnissaa Inatsisartut akuerereerpaat. Tassanerpiarlu kommunit Naalakkersullu suleqatigiinnerusariaqarput, Ane Hansen isumaqarpoq.

- Kommuunit tamakkerlugit suliamut tamakkiisumik ilanngunneqassasut Kommune Qeqertalimmit piumasaraarput, pilersaarummimmi Namminersorlutik Oqartussat iluanni taamaallaat atugassiaasumik suliaqartoqaraluarpat nikeriaqqippallaarnavianngilagut, borgmesteri allappoq.

Ane Hansenip ilanngullugu Isumaginninnermut Naalakkersuisoq Martha Abelsen kaammattorpaa meeqqat pillugit suliani pitsaanerusumik suliaqarnissamut Kommune Qeqertalik misiliutigeqqullugu.

- Tamatta nalunngisatsitut nuna tamakkerlugu isumaginninnerup tungaatigut suliassanik suliarinninnikkut kinguaattooqqasoqartuarpoq nutaanillu suleriaaseqarnikkut aatsaat suliassat amerlassusaat appartinneqarsinnaapput. Kommune Qeqertalimmit suleqataarusoqaagut, nutaamik allaffissornikkut aaqqissuussisimanitta ilusilersornera ilutigalugu allaat isumaqarpugut nutaanik periutsinik pilersitsiffissatut piukkunnaateqarluartugut, Ane Hansen allappoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER