Ane Hansen nuna tamakkerlugu upalungaarsimanermik piumasaqarpoq

Ukiuni tulliuttuni silaannaap kissatsikkiartornerani panertarnera piffissami annertuumi nunap ikuallanneri annertuut takussaanerulissapput. Kommune Qeqertalimmi borgmesteri, Ane Hansen (IA), taama naliliivoq.

- Tamannalu nunatsinni aamma malugeqaarput inoqarfiusuni, uumasoqarfinni piniariartarfinnilu.

Najukkami upalungaarsimasut maanna nuna tamakkerlugu upalungaarsimasunik ilaneqartariaqartut, taanna isumaqarpoq.

- Maanna piffissanngorpoq inoqarfiit upalungaarsimanermik illersorneqareersut killingat qaangerlugu, nuna tamakkerlugu naalakkersuinikkut pinngortitami ikuallattoqarnerani upalungaarsimasoqalernissaata suliniutigineqarfigilernissaa. Taamaalilluni siunissaq ungasinnerusoq qaninnerusorlu eqqarsaatigalungit Kalaallit Nunatsinni nunat panerlutik ikuallanneranni qamisaanissamut upalungaarsimasoqalerniassammat.

Sukkanerusumik ataatsimut iliuuseqarneq

- Nunatsinni nunarujussuit ikuallanneranni qatserinermi qamisaanermik ilisimasallit, qamisaanermilu atortut amingaatigaavut, taanna oqarpoq.

Maanna Sisimiut Kangerlussuullu akornanni nunap ikuallarujussuarnerani Qeqqata Kommunia qatserinissamut ikiortissarsiormat Kommune Qeqertalimmiit qatsersisartut Qeqqata Kommuniani ikuallaffiusumut qamisaajartortillugit ikiukkiartortitsivugut ikiuunnisarput pisariaqartinneqavissoq takusinnaagatsigu.

- Maanna siunissami pisuni taamaattuni piaarnerusumik ikioqatigiinnerup aallartinneqartarnissaa pilersaarusiussallugu pisariaqalerpoq

- Kalaallimmi uagut kulturitsinnut atasumik pinngortitamik atuisorujussuuvugut isumannaatsumillu atuisinnaanissarput ataatsimorluta upalungarsimanermut tungasunik pilersaarsusiornissarput pisariaqalerpoq.

Kangerluarsuk Tullermi annertuumik ikuallattumut qamisaanermut ikiuiartortut, inuit 38-t atortorpassuillu marlunngormat aallartinneqarput.