Ane Hansen ataatsikkut qinersinissaq pillugu: Paatsiveqanngilaassangunarpoq
Kommuni Qeqertalimmi borgmesterip ullormi qinersivimmi ataatsikkut qinersisoqarnissaa ernumagilaarpaa, neriuutigaluguli qinersiartortut amerlanerunissaannut sunniuteqarluassasoq.
Kommuni Qeqertalik kommunimut, nunaqarfinni aqutsisunut ilagiillu sinniisaanut apriilip arfernani qinersisoqarnissaanut qangali piareersareersimavoq. Inatsisartunulli qinersisoqarnissaa ilanngunneqarmat suliassaqarnerulersimalluni.
- Qinersisoqarnissaanut piareersarluareersimavugut, tamarmillu inissinneqareerlutik, borgmesteri Ane Hansen Sermitsiaq.AG-mut oqarpoq.
Borgmesterip oqaatigaa kommunimit coroan eqqarsaatigineqareersimasoq, inuppassuillu ataatsikkut qinersiartunnginnissaat anguniarlugu paasisitsiniaaniarlutik.
- Inuit kaammattorusuppavut allakkatigut taaseqqullugit. Coronap tuniluutilersinnaaneranut tamanna pinaveersaartitsissammat, aamma inuit inuppassuit ataatsikkut qinersiartornissaannik annilaanngateqartut ikiorsinnaavagut, taanna oqarpoq.
Qinigassanngortittunut innuttaasunullu unammillernartoq
Borgmesterip ilisimaarilluarpaa, kommunimut tunngassuteqartut nunamullu tamarmut politikkip qinersisartunit immikkoortinneqarnissaannik ikiuiniarneq suliassaassasoq annertooq.
- Takorloorsinnaavara paatsiveqanngilaarsinnaasoq. Aamma qinigassanngortittunut sunik sulissuteqarniarnernerminnik saqqummiussiniartunut. Politikkerimmi aamma kommunini Inatsisartunilu akisussaaffiit immikkoortikkuminaassinnaavaat, Ane Hansen oqarpoq.
Borgmesterip erseqqissaassutigaa, politikkerit suliassarigaat kommunip sunik oqartussaaffeqarneranik inunnut oqaluttuarissallugu. Borgmesterimit neriuutigineqarpoq, inuit Inatsisartunut qinersiartorneranni kommunimut qinersisut amerlanerunissaat.