Qaasuitsoq Kujalleq
Ane Hansen: Allaffissorneq nutarsarneqassaaq
Qaasuitsoq Kujallermi borgmesterinngortussap, Ane Hansenip (IA) allaffissorneq nutarsarusuppaa. - Kalaallit naleqartitatsinnut kulturitsinnullu tulluarsakkamik pisariittumik ingerlatsisoqalissasoq, taanna oqarpoq.
- Kommunalbestyrelsinngortoq innuttaasut qanimut suleqatigalugit sulissaaq.
Qaasuitsoq Kujallermi kommunalbestyrissaq Inuit Ataqatigiinnit Siumumiillu siuttuuffigineqartoq nalunaaruteqarpoq.
- Kommunissatsinni allaffissornikkut aqutsinermi nutaaliorniarpugut , kalaalisut naleqartitatsinnut kulturitsinnullu tulluarsakkamik pisariittumik ingerlatsiniarpugut ineriartortitsillutalu. Kommunit allaffii sapinngisamik pisariittumik aqunneqassapput innuttasunut saaffigiuminarlutik qanilartuullutillu sullissilissallutik, inissiterilluni naapeqatigiinnerup kingorna, borgmesterinngortussaq, Ane Hansen oqarpoq.
Atuaruk: Avannaani isumaqatigiinnginneq - Ane Hansen borgmesterinnguinnassaaq
Innuttaasunut qanilaarneq
IA-p Siumullu 'kommunissatsinni aqutsinermi nutaaliorneq qallunaat europamiullu periusaanik ilaarsiinnarnerungitsoq pilersinniarpaaat'
- Siunertaraarput ullumi inuunitsinnut silarsuarmioqataanitsinnullu naleqqussarluta ingerlatsissalluta Nunatta namminersulivikkiartorneranut taperlaalluarluta, Nunattalu sinneranut maligassiueqataarusulluta allaffissornermi pisariitsumik innuttaasunullu qanilartumik sullissiniarluta, taanna ilaatigut oqarpoq.
Atuaruk: Ane Hansen: Silatusaarneq ajugaassutigaara
Ineriartortinneqarsinnaasut arlaqartut
Ikaarsaariarnermi siulittaasunngortup aamma oqaatigaa, kommunissap inuussutissarsiornermik suliaqartut qanimut suleqatiginerisigut namminersortut, pisortallu suliffeqarfiutaanik annertusaaffigissallugu suliffeqarfiliorfigissallugu orniginartuunissaa sulissutigissutiginiarpaat.
- Aningaasarsiornermi naleqartitavut aalisarneq piniarnerlu naalakkersuinikkut suliallit qanimut suleqatigalugit piorsaavigissavagut. Tunisassiorneq imminullu pilersorneq aamma annertusassavarput.
Kommunissllu takornarialerineq aatsitassarsiornerlu sulissutigisassaasa ilagaat. Taassuma saniatigut kommunissap ilisimatusarnikkut misissuinerit soqutigisaringai pilerinarsarneqassasulli, Ane Hansen oqarpoq.
- Ikaarsaariarnermi siulittaasunngortoq: Ane Hansen, Inuit Ataqatigiit
- Siulittaasup tullia: Otto Jeremiassen, Kangaatsiaq
- Siulittaasup tulliata aappaa: Hans Aronsen, Kangaatsiaq