Aleqap atornerluinera

Andreas Uldum: Steen Lynge, akisussaassusermik takutitsigit

Steen Lynge Aleqa Hammonditulli eqqunngitsuliorsimavoq, taama Demokraatit siulittaasuat Andreas Uldum isumaqarpoq AG-p oqaluttuarereeraalu Steen Lynge aamma nunatta karsianit atuisimasoq

Demokraatit siulittaasuat Andreas Uldum

Naalakkersuisuni kikkut nunatta karsianit aningaasanik atornerluisimanersut aviisi AG sapaatip akunnerani uani saqqummiussivoq.

Steen Lyngep ilaquttami angalanerinut nunatta karsia akiliitittarsimavaa. Tamannalu nammineq Atassutillu toqqorterniarsarisimavaat, iluatsinnaguli. Steen Lyngep atorfilittai maanna pisuutinniarneqalerput. Taamaattoqarsinnaanngilaq. Akisussaassusermik takutitsisoqarli, Demokraatit siulittaasuat Andreas Uldum oqarpoq.

Atuaruk: Atassut: Steen Lynge tatigaarput

AG-p Steen Lynge Aleqa Hammonditulli nunatta karsianik atuisarsimasoq saqqummiuteqqammiinnaraalu Atassut tusagassiuutinut nalunaaruteqarpoq. Nalunaarummi partii Steen Lyngemut tatiginninnerarpoq, tassami Steen Lyngep Naalakkersuisoqarfigisimasaata Steen Lyngep ilaqutaasa angalanissaat akilerallartarsimavaat Namminersorlutillu Oqartussanit nassuerutigineqarsimavoq Steen Lyngep akiligassai kukkunikkut pilersimasut.

- Steen Lynge angalanerit sioqqullugit nunatta karsianut akiligassani akilertarsimanngilai, taamaaliornermigullu Aleqa Hammonditulli eqqunngitsuliorpoq. Allaanerussuteqanngilaq, Andreas Uldum isummersorpoq.

Steen Lyngep bilitsinut akiliunneqarsimavoq
AG-mit saqqummiunneqartutut Steen Lyngep ilaquttami angalanerat nunatta karsianit akilertittarsimavai. Taamaammat Andreas Uldum isumaqarpoq Steen Lynge Aleqa Hammonditorluinnaq iliuuseqarsimasoq angalanerit sioqqullugit akiliukkallarneqarnini akilersimannginnamigit.

- Allaanerussuteqanngilaq. Tamanullu eqqaasitsisutigilaarlara maanna qineqqusaarnitsinnut suna peqqutaarpiarnersoq, tassalu Aleqa Hammondip ilaquttami angalanerinut allanullu nunatta karsia atortarsimammagu, Andreas Uldum oqarpoq, nangillunilu:

- Tamannalu qulaajarneqarmat Aleqa Hammondip atorfilittani ingerlaannaq pisuutippai. Tamanna tusagassiortunik katersortitsinermi pivoq. Steen Lynge maanna asserluinnaanik iliorniarsarilerpoq - allaanerussutigiinnarpaali tusagassiorfinnut nalunaaruteqarluni taamaaliorami. Tusagassiorfinnut nalunaarummi - Atassutip siulittaasuanit Knud Kristiansenimit atsiorneqarsimasumi - Steen Lyngep naalakkersuisoqarfiani atorfilittat tamakkiisumik pisuutinneqarput. Pisumut allamut assigiissuteqarnera kisima takusinnaanerpara?

- Tamanut erseqqissaatigeqqissaartariaqarpara; Naalakkersuisutut atorfeqaraanni inatsisit malittarisassallu malinneqarnissaat akisussaaffigineqartarpoq. Tamakkulu ilisimaarinissaat aamma akisussaaffigineqarpoq. Allatut oqalunneq utoqqatsissutipalaaginnaapput, Andreas Uldum oqarpoq.

Andreas Uldum: Atassut Steen Lyngelu toqqorterigaluarpat?
Tamatuma saniatigut Andreas Uldum isumaqarpoq makku apeqqutigissallugit pissusissamisoortoq:

  1. Steen Lynge toqqortigassaqarsimanngikkuni, taava sooq matumani suliaq ammasumik unneqqarissumillu saqqummiussimanngilaa?
  2. Sooq ATASSUT inuiaqatigiinnut unneqqarilluni taamatut pisoqarsimanera oqaluttuarisimanngilaa?
  3. Bankboksimi akissutissat allat suut toqqorterneqarpat?

- Bankboksip tusaamanerlugaasup ammarneqarnissaanut aaqqiissutissamik nassaartoqarnissaa Demokraatit sinnerlugit kaammattuutigeqqissavara. Qinersisoqareerpat aatsaat ammarneqarnissaa kikkulluunniit iluaqutiginavianngilaat.

- Steen Lyngemut tunngatillugu qulaajarneqartoq tamatumunnga assersuutissaalluarpoq. Qulaajarneqartummi qinersinerup kingorna aatsaat saqqummiunneqarnissaa Steen Lyngemit Atassummiillu neriuutigineqarsimagaluartoq erseqqilluinnarpoq. Tamannalu Steen Lyngemit Atassummiillu akisussaassuseqanngitsuliorneruvoq angisooq, Andreas Uldum oqarpoq.

Powered by Labrador CMS