Anaanarput Kalaallit Nunaat qanoq ateqassava?

Nunarpassuit namminersulerniarnerminnut ilungersuuteqarnerminni nunartik nutaamik atsertarpaa. Kalaallit Nunaammi?

Apeqqut taanna "Kalaallit Nunaanni inatsisinut tunngaviusussanut isumalioqatigiissitamik pilersitsinissamut nalunaarusiaq"-mi qaqinneqarpoq, taanna Inatsisartut qanittukkut suliareqqammerpaat.

- Nunap aqqa nunap aaqqissuussaaneranut aqunneqarneranullu maleruagassani tunngaviusuni aalajangersarneqassaaq tunngavilerneqarlunilu. Nunap aqqa pillugu apeqqut sammisaavoq oqallinnerni piffissamiit piffissamut saqqummertartoq, allaanissaannut siunnersuut tassaalluni Inuit Nunaat. Nunap aaqqissuussaaneranut aqunneqarneranullu maleruagassanut tunngaviusunut atatillugu ateq atuutilivilersussatut siunnersuutigineqarsinnaavoq, nalunaarusiami erseqqissarneqarpoq.

Nalunaarusiami immikkoortortami 'nunap aqqani' aamma nunat allat atermik nutaamik atuilissanersut atuilissannginnersulluunniit nalilerneqarpoq.

- Kalaallit Nunaat naalagaaffimmit anippat, nunartik nutaamik ateqalernissaanik inuiaat kalaallit aalajangissappata tamanna ataqqineqassaaq. Piumasarineqartumik tamanna nunarsuarmiunit ataqqineqassaaq. Pisuni allani takuneqarnikuuvoq inuiaat nunami aqqanik allannguillutik, tassani isummiunneqarpoq.

Oqallinneq
Kingullermik 'Kalaallit Nunaat' upernaakkut ataatsimiinnermi oqallisigineqarnikuuvoq, tassani Siumumeersup Nikolaj Jeremiassenip apeqquteqaat aallaavigalugu oqallinnissamik piumasaqarpoq, nuna siunissami 'Inuit Nunaannik' ateqalertariaqarnersoq oqallisigineqassasoq.

Taamani kulturimut naalakkersuisuusimasup, Nivi Olsenip, tamanna apeqqut tunngaviusumik inatsisissamut isumalioqatigiissitamit sammineqarasinnaasoq akissutigaa.

- Innuttaasut akornanni oqallilluartoqartinnagu, apeqqummi matumani allannguuteqartoqartariaqanngilaq, Nivi Olsen akissuteqarnermini taama naqissusiivoq.

Sermitsiaq.AG-mi atuartartut siunnersuutissaqarunik, uuma ataani isummersortarfimmi siunnnersuuteqarsinnaapput.