- Anniaqaanga. Najugaqarfinniit napparsimavik takusinnaavara, paniga ambulancenut ikisoq Ivaaqqamukaanneqartoq ippassaq isiginnaarpara, Maibritt Lothsen, innarluutilimmut anaanasoq oqarpoq.

Taassuma pania sulisut qanigisaasullu ilisimanngisaannik naartulersimavoq kingornatigullu ernilluni.

Taassuma kissaatigisimagaluarpaa panini Ivaaqqamut uterteqqinneqassanngitsoq, minnerunngitsumillu tassunga immikkoortortaqarfimmut, namminermi isumaqarpoq immikkoortortaqarfimmi tassani kannguttaatsuliorfigineqarsimasoq. 

Kissaataa tusarnaarneqanngitsoq

Maannakkulli arnaq 23-inik ukiulik immikkoortortaqarfimmut tassunga angerlartinneqarpoq. pisunut allanngorsimanngitsunut, inuit taakkorpiaat, sulisut aqutsisullu taakkorpiaat, anaanaasoq oqarpoq. 

- Kannguttaatsuliorfigineqarsimaffimminut paniga utertinneqarami qanoq misiginersoq takorloorsinnaanngilara, Maibritt Lothsen oqarpoq. 

Ulloq unnuarlu paaqqinnittarfik Ivaaraq immikkoortunut marlunnut avinneqarsimavoq, immikkoortortaq tungujortoq aamma immikkoortortaq sungaartoq. 

- Nalunngilara Ivaaqqami immikkoortortamut tungujortumukaanneqartoq, naak immikkoortortamut sungaartumukaanneqarnissaa piumasarinikuugaluariga, taanna oqarpoq. 

Danmarkiliarusunngilaq

Maibritt Lothsen Qaarsuneersuuvoq, taassumalu kissaatigigaluarpaa panini Ivaaqqamit anissasoq. Periarfissalli ajorluinnartut, taanna isumaqarpoq. Maibrittip ukiorpassuarni kissaatigisarsimagaluarpaa avannaanut angerlarnissartik. 

- Ivaaqqamiit nuutsinniarsarigaluarpara. Nunatsinnili allanik periarfissaqanngilanga, Danmarkimilu najugaqarsinnaananga. Kalaaliuvunga kalaallisuinnarlu oqaluttuullunga, naluara qanoq iliussanerlunga, Maibritt Lothsen oqarpoq.