Ammasuuneq? Naalakkersuisut ukioq manna ataatsimiinnernit imaqarniliat saqqummiutinngilaat
Naalakkersuisut sapaatip akunneranut ataatsimiittarnerminnit imaqarnilianik saqqummiussisarnerat ileqquusaraluarpoq. Ukioq mannali taamaattoqanngilaq. Tamanna sulissutigineqarpoq, attaveqaqatigiinnermut pisortaq oqarpoq.
Naalakkersuisut 2023-mi sunik aalajangiisimanersut innuttaasunut tusagassiorfinnullu malinnaaffigissallugu manna tikillugu ajornakusoorpoq.
Naalakkersuisummi ataatsimiinnerminnit imaqarniliat ileqquusoq malillugu saqqummiuttanngilaat. Nalinginnaasumik imaqarniliani Naalakkersuisut sulianik sunik suliaqarsimanersut atuarneqarsinnaasarpoq, kiisalu qanoq aalajangiisoqarsimanersoq.
Inatsisartut ataatsimiinngikkaangata Naalakkersuisut sisamanngornerit tamaasa ataatsimiittartut, Naalakkersuisut.gl-imi allaqqavoq. Inatsisartut ataatsimiinnerisa nalaanni Naalakkersuisut ullut tamaasa ataatsimiittarput, pisariaqartitsisoqaraangallu immikkut ittumik ataatsimiittoqartartoq.
Akuerineqareeraangata saqqummiunneqartartut
- Naalakkersuisut ataatsimeereeraangata aamma arlalinnik aalajangeereeraangata, taakku Qitiusumik allattoqarfimmut imaqarniliatigut ingerlateqqinneqartarput. Imaqarniliat taakku akuerineqareeraangata nittartakkami saqqummiunneqartarput, nittartakkami taama allassimasoqarpoq.
Imaqarniliaq kingulleq ataasinngornermi ullaap tungaani 15. december 2022-meerpoq – tassa qaammatinik tallimanik pisoqaassusilik.
Imaqarniliat sooq nittartakkamut ilineqarsimannginnersut, kiisalu akuerineqannginnerat pissutaanersoq, Sermitsiaq.AG-p attaveqaqatigiinnermut pisortamut Irene Jeppsonimut apeqqutigai.
Attaveqaqatigiinnermut pisortap tamanna akinngilaa, kisianni imaqarniliat nittartakkamut ilineqarnissaat sulissutigineqartoq ilisimatitsissutigaa.