misissuineq
Ammasumik sulisoqarnissaa pinngortitallu paarineqarluarnissaa piumasarineqartoq
Pinngortitap avatangiisillu illersorneqarnissaat. Ammasumik sulisoqarnissaa. Siunissami uuliasortoqalernissaa pillugu kalaallit aalajangiinissaminni oqaatigineqartut pingaartitaraat
Uuliasiornissap aallartinnginnerani pinngortitaq avatangiiserlu illersorluarneqarnissaat qulakkeeqqaarlugu uuliasiulernissaq aalajangiunneqartariaqartoq kalaallit 98 procentii isumaqarput.
Aalajangiinissamut sulinermi inuit apersorneqartut 95 procentii isumaqarput sulineq ammasuusariaqartoq.
HS Analyse Canadamiut suliniaqatigiiffiannut Oceans North-imut innuttaasunik misissuivoq.
- Misissuinerup takutippaa Namminersorlutik Oqartussat aatsitassarsiornissamut apeqqummut innuttaasunik ilaatitsinerusariaqartoq. Pinngortitaq avatangiiserlu, kiisalu ammasumik sulisoqarnissaa innuttaasunit pingaarnerpaatinneqarpoq, ICC-ip præsidentia Aqqaluk Lynge oqarpoq.
Uuliasiortoqarnissaa isorineqartoq
Uuliasiortoqarnissaa pillugu sulinermi Namminersorlutik Oqartussat pitsaanerusumik sulisariaqartut misissuinerup takutippaa. Uuliasiornissaq pillugu paasissutissiinerit apersorneqartut isumaqarput.
Apersorneqartut sisamararterutaannaat isumaqarput Namminersorlutik Oqartussat uuliakoortoqannginnissaa anguniarlugu sulilluartuusut. 60 procentiilu isumaqarput Namminersorluk Oqartussat uuliasiornermi suut navianartuunersut ilisimatitsissutigineqarsimanngitsut.
Iliuuseqartoqartariaqartoq
Inuiaqatigiit annertunerusumik peqataatinneqartariaqartut ICC Greenland WWF-ilu isumaqarput.
- Inuiaqatigiit isumaat tusaaneqartariaqarput. Tamanna ukiuni kingulliunerusuni pisimanngilaq. Tamanna akuersaarneqarsinnaanngilaq. Pitsaanerusumik sullissisoqartoqartariaqarlerpoq, tamannami misissuinerup takutippaa, WWF-ip allattaanera Gitte Seeberg oqarpoq.
Oqarasuaatitigut misissuineq ingerlanneqarpoq, inuit 700-t peqataallutik, taakkunanngalu 54 procentii isumaqarput uuliasiornissaq navianartuusoq, 19 procentiinnaallu isumaqartut uuliasiornissaq isumannaatsuusoq.
Inuit apersorneqartut amerlanerpaartaat isumaqarputtaat uuliasiornissaq aatsitassarsiornissarlu sammineqarpallaartut, aalisarnikkut takornarialerinerlu siunissami aningaasaqarnikkut pingaaruteqassasut isumaqarlutik.