Skip to main content

Ammasumik siunersiuinerit atorneruleriaannaapput

IA-p siulittaasuata ataasinngornermi ammasumik siunersiuisoqarnera nuannaarutigaa. Ammasumik siunersiuinermi tusagassiortut malinnaatinneqarput, soraarnerussutisiaqalernissamut ileqqaarnissamut aaqqissuusseqqinnermi allaffissornikkut kukkuluttortoqarsimanera taamaasilluni tamanit paasineqarsinnaalerluni.

Ataatsimiititaliami ilaasortat amerlanerussuteqartut ammasumik siunersiuisoqarnissaa piumasaralugu taasissutigippassuk, naalakkersuisoq akisussaasuusoq ammasumik siunersiuinermut aggersarneqassaaq.

Nunatsinni ammasumik siunersiuineq oqaluttuarisaanermi siullerpaaq ataasinngormat ingerlanneqarpoq. Tassani aningaasaqarnermut naalakkersuisoq Vittus Qujaukitsoq pinngitsoorani soraarnerussutisiaqalernissamut ileqqaartarnissamut tunngatillugu suliaq, aammalu akileraartarnermut uppernarsaat atorlugu qaffasinnerusumik akileraartitsisalerneq pillugit aningaasaqarnermut akileraartarnermullu ataatsimiititaliami ilaasortat nassuiaappai.

- Tamat oqartussaanerannut iluaqutaavoq, pitsaasumillu alloriarnerulluni. Neriuppugut siunersiuineq taamaattoq ataasiaannarnerussanngitsoq, kisiannili Inatsisartut sulineranni ileqqunngortinneqassasoq. Nuannaarutigaa partiit allat aamma taama nipeqartumik oqariartormata, Múte B. Egede Sermitsiaq.AG-mut oqaluttuarpoq.

Aningaasaqarnermut naalakkersuisoq ammasumik siunersiuinermut aggersarneqassasoq, illuatungiliuttut, tassa Inuit Ataqatigiit, Partii Naleraq, Atassut aamma Suleqatigiissitsisut piumasarisimavaat.

- Uani pisumi ataatsimiititaliaq tamarmiusoq isumaqatigiippoq ammasumik siunersiuisoqassasoq, tamat suliami paasisaqarnissaat anguniarlugu.

Ataatsimiititaliami siulittaasoq, Hermann Berthelsen ammasumik siunersiuinerup akunnernik pingasungajannik sivisussuseqartup naammassilernerani, ammasumik siunersiuisoqarsimanera naammagisimaarlugu aamma oqaaseqarfigaa.

Ataatsimiititaliaq aalajangiissaaq

Ammasumik siunersiuinissamut periarfissaq Inatsisartut suleriaasianni periarfissatut allassimavoq, piffissamili sivitsortumi atorneqarsimanani.

- Ataatsimiititaliaq qanoq ilisukkulluunniit Naalakkersuisunut ilaasortamik siunersiuinissamut ilisimatitsiffiusumilluunniit ataatsimiinnissamut aggersaasinnaavoq, Inatsisartut suleriaasianni paragraf 19-imi allassimavoq.

- Siunersiuinermut ilisimatitsiffiusumilluunniit ataatsimiinnermut matoqqasumut tamanulluunniit ammasumut aggersaasoqarsinnaavoq. Tamanut ammasumik siunersiuinermut ilisimatitsiffiusumilluunniit ataatsimiinnermut aggersaasoqarpat ataatsimiinnermi kikkulluunniit najuussinnaapput. Siunersiuinerit ilisimatitsiffiusumillu ataatsimiinnerit tamanut ammasumik ingerlanneqartut immiussissutinut immiussissutinulluunniit assigisaannut immiunneqassapput, Inatsisartut suleriaasianni paragraf 19 immikkoortoq 4 taama allassimavoq.

Siunersiuineq ammasuuppat matoqqasuuppalluunniit apeqqutit nalinginnaasumik killeqartinneqarneq ajorput, ataatsimiititaliamiilli akuerineqaqqaartarlutik.

- Ammasumik suleriuseqarneq eqqartoraangatsigu, tassa ilaatittarparput ammasumik siunersiuinerit. Ammasumik siunersiuisoqarnera maanna naammassimmat nuannerpoq, Múte B. Egede oqarpoq.

Oqimaalutaq nikissinnaalerpoq

Naalakkersuisoq ammasumik siunersiuinermut aggersarneqarsinnaanera 2008-imili periarfissaareeraluartoq, siornatigut atorneqarsimanngilaq. Ataasinngormat naalakkersuisoq ammasumik siunersiorneqarmat oqaluttuarisaanermi siullerpaavoq.

Pisumi tassani partii naalakkersuisuutitaqartoq partiillu illuatungiliuttut ataatsimiititaliami amerlaqatigiipput.

Aningaasaqarnermut akileraartarnermullu ataatsimiititaliami ilaasortat arfineq-marluupput. Pingasut Siumut tunuliaqutaraat. Marluk Inuit Ataqatigiit, Partii Naleqqamit ataaseq aamma Demokraatinit ataaseq ilaasortaallutik.

Partii naalakkersuisuutitaqartoq pingasunik ilaasortaatitaqartoq, illuatungiliuttullu pingasuusut, suliani Demokraatit naalakkersuisunut tapertaasutut inissisimasut aalajangiisuusarsinnaapput. Partii taamaalilluni ammasumik matoqqasumilluunniit siunersiuinissamut aalajangernermi oqimaalutamik aalajangiisuusinnaavoq.

Ammaneruneq nuannaarutigaa

Ammasumilli siunersiuisoqarneranut – aamma ataatsimiititaliani allani – ammanerulerneq, IA-p siulittaasuata nuannaarutigaa, neriuutigalugulu sulinermi ammanerusoqalissasoq.

- TV-kkut nittartakkakkulluunniit toqqaannartumik aallakaatitsisoqarsinnaaneq periarfissaavoq. Siunissami taakku atorneqalernissaat neriuutigaara, oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER