Ammassalik uummammioralugu

Karin minutsialunnguit oqaloqatigereerlugu paasinarsimavoq, Kalaallit Nunaanni meeraasimanera tunissutit pitsaanerpaartarisimagaat. Oqaloqatigiinnitta ingerlanerani Karin meeraanermini pisimasunik eqqaasaqaraangami pilluarpasilerlunilu attortittarpoq.

Karinip angajoqqaarai angallammik aquttoq Niels L. Underberg nulialu Ketty. Ilaqutariit ukiuni 25-ni Ammassalimmi najugaqarsimapput. 1950-imiit 1975-imut. Niels L. Underberg Den Kongelige Grønlandske Handelip angallataanik, ukiut 25-t ingerlaneranni assigiinngitsunik pingasuusunik, Ammassaliup eqqaani angalasarnermi saniatigut dommeriusimavoq. Angallat ukiukkut sikuutillugu umiarsulivimmiittarpoq, sikuuneranilu eqqartuussivimmi suliassanik suliarinnittarluni.

Niels L. Underbjergip ilaquttani peqatigalugit misigisimasatik annertuut annikitsullu atuaruminaqisumik atuakkiarisimavai, tassaasut "Underdrejet" aamma "Ved solens Gæstested". Atiani naalisagaq L’ tassaavoq Larsen. Danskeq ilisimaneqarluartoq taalliortuusorlu Thøger Larsen akkagivaa. Atuakkiaani Thøger Larsenip oqaasii arlallit issuaaffigineqartarsimapput.

Suut tamarmik kinguneqartartut

- Kalaallit Nunaat uummammioriuaannarpara, Karin Fynip qeqqaniittumi Ringemi inaani soqutiginarluinnartumik oqaloqatigineqarnermini oqaluttuarpoq.

1955-imi inunngorsimavoq. Taamanikkut angajoqqaavi ukiuni tallimani Ammassalimmi najugaqareersimapput. Qatanngutigiinni sisamaasuni angajullermut tulliuvoq.

- 13-inik ukioqarlunga atuarnera Danmarkimi nangittussaanngorlu atuariartortinneqarlunga aallartinneqannginninni ukiut Ammasalimmi inuuffigisimasakka pillugit eqqaamasarpassuaqarpunga. Illorput aappaluttoq nuannerluinnartoq. Aput. Qimmit. Aasakkut angalaartarnerit. Nuannernerpaatut misigisarsimasamma ilagaat, ataatanga ataatamaluunniit sulisuisa pikkorissorsuit ”Ejnar Mikkelsen” aqullugu sikut akornasigoortillugu ingerlatsigaangata umiarsuup siuni issiaartarnera.

- Angallat sikut akornatigoortillugu sikunik qalipaaterpassualinnik aporserpaluttarnera puigunngisaannarpara. Aamma angallammi inutta nunaqarfiit ilaanni usilersorlutillu usigiaasarnerat puigunngisaannarapara. Aalisaatiga tigoriarlugu aalisartarpunga. Kanassut uukkallu qaqittarpakka. taakku angallammi suppaliarilluartarpavut. Taamanikkut ulluinnani misigisimasarpassuakka tunngaviupput pinngortitamik nuannarinnilluartuuninnut.

Ammassalimmi meeraasimanitta nuannerluinnartut kinguneraat, ilaqutariinni meeqqanit sisamaasunit pingasut Danmarkimut atuartiartortinneqarsimanerat. Tamanna meeqqanut angajoqqaanullu misigisaasimavoq oqimaattoq.

Ammassalimmiit Sorømut

Karin Sorø Private Realskolemi atualersimavoq. Ammassaliup atuarfiani qajannaatsumik tunngavilerneqarsimagami ajornartorsiuteqalinngisaannarsimavoq.

-Ammassalimmi piginnaasaarluartunik tunniussimalluartunillu ilinniartitsisoqarsimavugut, taamaamma Sorømi ukioqatigisakka atuaqatigilerpakka. Aamma Ammassalimmi tredje klassimili tuluttut ilinniartarlersimavugut. Danmarkimi taamanikkut tredje klassimi suli tuluttut ilinniartitsisoqartanngilaq. Ilinniarnertuunngorniartut isumaginninnermilu perorsaasutut ilinniagaqarsimavoq.

Karin Tunumi alliartornermini sulinissamut nukissanik pitsaasunik tunineqarsimavoq.

- Ammassalimmi meeraasimanera pissutigalugu, danskiunngitsut inuilli allat allanik kulturillillit suleqatigilluarsinnaallugillu paasisinnaasarpakka. Ammassalimmi aamma meeraasimaera pissutaagunarpoq, soqutaanngitsunik eqqarsaasersortannginninnut. Akerlianik utaqqinissamut naammagittartunngorsimavunga. Tamannami ilikkarsimavara. Danmarkimi inuit ulapippallaartarnerat tupigisarpara. Imaluunniit qimuttuitsoq bussiluunniit uninngasussanngoraangat inuit uippallilertarnerat tupigisarpara.

Karin ukiut-marluk matuma siornatigut ukiuni 38-ni siullermeerluni inunngorfimminiissimavoq. Tasiilami aasaanerani atuartitsinermut peqataajartorsimagami.

- Misigisaq sutigut tamatigut nuannerluinnartuuvoq, Karin oqaluttuarpoq, erseqqissaassutigalugulu:

- Angerlamut apuuppunga. Attorteqaanga, minnerunngitsumik meeqqanik peqateqarnera nuannerluinnarsimavoq.