Skip to main content

Ammartagaq meeqqat pisinnaatitaaffiinik imaqartoq

FN-ip meeqqat pillugit isumaqatigiissutaa novemberip 20-ani 30-liinersiortinneqassaaq. Tassunga atatillugu Nakuusa Unicefilu meeqqanut pingasuniik arfineq-pingasut tungaannut ukiulinnut juullip tungaanut ammartagaliortitsipput.

Ammartagaq meeqqanut pingasuniik arfineq-pingasut tungaannut ukiulinnut tulluartoq Brugsenimi Pilersuisumilu tallimanngorpamiit akeqanngitsumik agguaanneqalissaaq.

Miilu Nissilu atorlugit 2015-imi meeqqat inuunerissaarnissamut toqqissisimanissamullu pisinnaatitaaffeqarnerat pillugu oqartiartuutinik saqqummiisoqareernikuuvoq.

Nakuusa Unicefilu ammartakkamik maanna saqqummersitsilerput, meeqqat pisinnaatitaaffitik pillugit juullip tungaanut ilisimasaqarnerulerniassammata.

- Neriuppugut ammartagaq ilaqutariinnut inuunermi nuannersut meeqqallu inuunerani toqqisissimanartut eqqartornissaannut isumassarsititsilluassasoq. Juulli uatsinnut tassaavoq ataatsimoorfik nuannaarfillu ammartagarlu ataatsimoorluni toqqissisimaneq juullillu qaammataa nuannersoq ataatsimoorluni sammisaqarnikkut eqqartornissaannut sanaajuvoq, Nakuusami sulianik aqutsisoq Najaaraq Møller, tusagassiutinut nalunaarummi oqarpoq.

Inuunerissaarneq toqqissisimanerlu

FN-ip Meeqqat pillugit isumaqatigiissutaa meeqqat pisinnaatitaaffiinik tamanik imaqarpoq. Nakuusalli ammartagaliaani immikkoortoq 6 pingaarnertut inissisimatinneqassaaq.

- Meeqqap inuunermut, inuuginnarnissaminut ineriartornissaminullu pisinnaatitaaffeqarnera minnerunngitsumillu toqqissisimanartumik inuuneqarnissamut pisinnaatitaaffeqarnera, Naalagaaffiit Peqatigiit Meeqqanut Isumaqatigiissutaanni qitiulluinnarput. Ukioq manna, isumaqatigiissutip ukiut 30-nngortorsiornerani, pisinnaatitaaffik taanna ammartakkap meeqqanut ilaqutariinnullu agguaanneratigut eqqaasitsissutigerusupparput, Sara Olsvig, UNICEF Danmarik Kalaallit Nunaanni suliniutinut pisortaa oqarpoq.

Unicef ilisimatitsivoq ammartakkat 12.000-it naqiterneqarsimasut Pilersuisunut Brugseninullu nassiussuunneqareersimasut. Ammartakkanik suliaqarnermi Pilersuisoq aamma Brugseni aningaasaliipput. Ammartakkallu angallannerannut Royal Arctic Line isumaginnilluni tapiilluni.

Meeqqat tamakkerlutik suli pisaartinnagit niuertarfiit ammartakkanik nunguutsissagaluarpata, Nakuusa nassiussueqqinnissaminut piareersimavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER