Ammaaqqinneq: Nunat ilaannit killilersugaanngitsumik tikittoqarsinnaanngorpoq
Nunatta ammaqqikkiartuaarnerata immikkoortuata pingajuat marlunngorpat atuutilissaaq. Naalakkersuisut Siulittaasuata Kim Kielsenip tusagassiortunik katersortitsinermi ilisimatitisissutigaa.
Kim Kielsenip sisamanngornermi ullup-qeqqata siornatigut tusagassiortunik katersortitsinermi oqaluttuara, Nunatta ammaqqikkiartuaarnerani immikkoortut pingajuat qanittukkut atuutsinneqalissasoq.
Kim Kielsen naapertorlugu immikkoortoq nutaaq marlunngorpat atuutsinneqalissaaq, ilaatigullu timmisartukkut ilaallutik Kalaallit Nunaannukarniartut amerlassusaat killilersorneqarunnaassalluni.
Tikinnermiit misissorteqqinnissamut piumasaqaatit aamma sakkukillineqarput:
- Tikinnermiit ullut tallimat qaangiunnerani misissorteqqinnissaq piumasaqaataajunnaarpoq. Kalaallilli Nunaannut tikikkaanni tunillatsissimannginnermut uppernarsaateqartoqassaaq, Kim Kielsen oqarpoq.
Tassa tikittut tunillatsissimannginnerminnut uppernarsaammik takutitsisassapput, aamma immersugassat Sumut immersorneqartassaaq.
Kalaallit Nunaannut timmisartukkut angalasut amerlassusissaannik killiliisimanermut taarsiullugu, nunanit sorlernit Kalaallit Nunaannukartoqarsinnaaneranik Danmarkimi Nunanut allanut Ministeeriaqarfiup piumasaqaatai malinneqassapput.
Politiit nakkutilliissasut
Tassa imaappoq, Danmarkimi innuttaasut ilaatigut killilersugaanngitsumik nunatsinnut isersinnaatitaalersut.
Politimesterip Bjørn Tegner Bayip tusagassiortunik katersortitsinermi oqaluttuaraa, nunanit tuniluuffiusupilussuarnit nunamut tikittoqannginnnissaa politiit isuamgissagaat.
Sumiiffinni ulorianartorsiorfiusinnaasuni, assersuutigalugu napparsimmavimmut ungasittuniittuni tuniluuttoqalersinnaanera minnerpaaffianiitinniarlugu, Kalaallit Nunaat immikkoortunut avinneqarpoq, tassa ilaat toqqaannartumik tikinneqarsinnaanngorlugit iaallu toqqaannartumik tikiffigisinnaajunnaarlugit.
Nuna immikkoortunut avinneqartoq
Naalakkersuisut Siulittaasuata, inuk ataaseq Danmarkimiit Upernavimmukassappat assersuutigalu oqaatigaa:
- Upernavimmut ingerlaqqitsinnanga ulluni tallimani Ilulissaniissaanga. Tunillatsissimanngikkuma Upernavimmut ingerlaqqissinnaassaanga. Oqartussat misissortinneq najugaqarnerlu akilissavaat, Kim Kielsen oqarpoq.
- Nunamik suli ammaaqqinnissaq inassutigisinnaavarput. Nunamili sumiiffiit ilaat mianernarnerupput. Avinngarussimasumiipput, taakkunanilu nappaammik tunillatsissimasoqarnersoq paasiuminaallunilu tuniluuttoqalernissaanik pinaveersaartitsinissaq ajornarsinnaavoq, Nunatsinni Nakorsaaneq Henrik L. Hansen ilanngussilluni oqarpoq.
Kielsenip ilanngullugu oqaatigaa, aaqqissuussanut peqataasinnaasut killeqartinneqarnerat decemberip 31-ata tungaanut atuutsiinnarneqassasoq. Taamaalilluni illup iluani aaqqissuussanut amerlanerpaamik 100-t peqataasinnaapput, silamilu aaqqissuussanut amerlanerpaamik 250-it peqataasinnaallutik.