Skip to main content

Ammaanersiorluni oqallinneq: Aajap piumasaraa, meeqqanut 100 millioner koruuninik aningaasaliissuteqartoqassasoq

Aaja Chemnitz Larsenip (IA) Folketingimi ammaanersiorluni oqallittoqarmat meeqqat atornerlugaasimasut qitiutillugit oqaaseqarnissani aalajangersimavaa

Aaja Chemnitz Larsenip (IA) nammineerluni qaqippaa: Folketingimi ammaanersiorluni oqalugiaatissaq angutinut tunngassuteqarsinnaagaluarpoq: Assersutigalugit Trumpip pisiaqarusulluni neqerooruteqarsimanera, isumannaallisaanermut politikki aningaasaqarnerluunniit.

Tamakkununngali taarsiullugit, meeqqat inuusuttullu atugarliortut 100 procentimik qitiutinniarlugit aalajangersimavoq. Aaja Chemnitz Larsen piviusorsiortuaannartoq, pingaartitaminik qitiutitsilluni oqalugiaatiminut tiguartissimaqisoq malunnarpoq.

-  Nunami inuuffigisatsinni meeqqat pingasunik ukiullit kinguaassiuutitigut nappaatinik tunillanneqartarpata aamma Tasiilami arnat 81 procentii kinguaassiuutitigut atornerlunneqarsimappata, taava tunngaviusumik ajornartorsiuteqarpugut. Pingaaruteqarpoq, eqeerluta ajornartorsiutip ilungersunarneranik takunnilernissarput. Minnerunngitsumillu ajornartorsiutit sorlaat aaqqiiffiginiarlugit Danmarkimit immikkut ittumik ikiorsiissutissamik atuinissarput pingaaruteqarpoq, oqalugiaat taamatut nipeqarpoq.

Ajornartorsiuteqarfiunerpaat

Ikiuigasuartussanik maanna Tasiilamukartitsisoqarnissaa nuannaarutigaa, peqatigitilluguli oqaatigalugu, ikiuigasuartussanik aallartitsineq aaqqiissuteqarniarnermut aallarniutaasinnaasoq. Ilaatigut piffissaq ungasinnerusoq eqqarsaatigalugu aaqqiissutissarsiortoqassaaq, ilaatigullu nunap ilaani allani Tasiilamisulli annertuunik ajornartorsiuteqartoqarnera eqqarsaatigalugu.

- IA-mit isumaqarpugut, taamatut inissisimasoaqarnera ajunaarnersuartut taaneqarsinnaasoq – taamaammallu ajunaarnersuartut isigalugu iliuuseqartoqartariaqartoq. Siunnersuutigivarput Kalaallit Nunaat Danmarkilu ikiuigasuarnissamut aningaasaateqarfiliussasut, inuttut ajornartorsiutaanerpaat suussusersiniarneqarnerannut

ikiuutaasinnaasumik. Taamaallaat taamatut iliornitsigut siusissukkut iliuuserisartakkavut iluaqutaanerpaasussanngorlugit  qqutissiuussinnaavavut.

Aaja Chemnitz Larsenip ikiugasuarnissamut aningaasaateqarfiup 100 millioner koruuninik imaqartinneqassasqo takorloorpaa, Danmarkimit 80 procentimik Kalaallillu Nunaannit 20 procentimik aningaasaliiffigineqartussaq.

Politiit sukkanerusumik sullissisarnissaat

 Isumaginninnermi susassaqarfik ilisimaneqartutut kalaallit akisussaaffigaat, taamaammat danskit ikiuiniarnerat immikkut ittuuvoq. Aaja Chemnitz Larsenilli oqaatigaa, kinguaassiuutitigut atornerluisinnaaneq pinngitsoortinniaraanni inatsiseqarnermut tunngassuteqartut pingaaruteqartut. Tassungalu tunngatillugu Danmark akisussaasuuvoq.

- Meeqqammi kinguaassiuutitigut atornerlunneqaraangata pinerliineq pineqartarpoq. Pinerliisarnerit sukkanerusumik pitsaanerusumillu qisuariarfigisartagassavut.

Kalaallit Nunaanni Politiit nalunaarusiaatigut takutinneqaqqammerpoq, Tasiilami meeqqat kinguaassiuutitigut atornerlunneqarsimasut pillugit suliat, videokkut apersuinertaqanngitsumik ingerlanneqaraangata, politiit ulluni 112-ini sulianik isumaginnittartut. Videokkut apersuisoqarsimagaangat sulit ulluni 239-ni ingerlanneqartarput. Taanna tassunga atatillugu isumaqarpoq, nunami sumiiffinni assigiinngitsuni meeqqat illuinik pilersitsiortornikkut tamanna ikiorsiiffigineqarsinnaasoq, meeqqat atornerlunneqarsimasut taamaalillutik saaffissamut ataasiinnarmut saaffiginnissinnaanngussapput.

-  Inuit Ataqatigiinni isumarput erseqqissoq tassaavoq, Kalaallit Nunaanni inatsisinut tunngassuteqartut Folketingimi pimoorunnerullugit akisussaaffigineqartariaqalersut. Maannakkutut taamatut isikkoqartillugit, Kalaallit Nunaanni politiit danskit politiivinit aningaasarsiatigut ajornerusumik atugartinneqarput. Tamanna aamma Savalimmiuni politiinut atuuppoq. Tassa pingasuugaangata marluk assigiinngitsumik pineqarnerannut assesuutissatsialak. Tamatuma kinguneranik Kalaallit Nunaanni sulisussaqarniarneq sulisunillu attassiinnarniarneq ajornartorsiutaasarpoq. Kalaallit Nunaanni ataatsimoorluta immikkut ittumik toqqissisimatitsiniarnitsinni tamanna ajoquseerujussuarsinnaavoq.

Aaja Chemnitz Larsenip oqalugiarnermi annersaani nuanniitsunik mianersoqqutitalinnillu oqaloreeraluarluni, oqalugiarnini isumalluarpaluttumik nipeqarluni naggaserpaa.

- Misilittakkalli qujanartumik aamma takutippaat, pissutsinik allannguisoqarsinnaasoq. Tamanna neriuuteqalersitsivoq. Kalaallit Nunaanni uummateqarfigisaminnik suliniuteqartorpassuit peqatigalugit meeqqanik kinguaassiuutitigut atornerluisarnerit amerlassusaat affaannanngortissinnaavavut. Maanna meeqqat tamarmik peqataatinneqarnissaaq qulakkiissavarput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER