Ammaanermi oqallinneq: Corona, perorsaasut nipisattassiinerlu sammineqarput

Inatsisartuni ilaasortat paaserusuppaat nipisattassiinermit suliamut aamma corona pissutigalugu akiligassap annertuup qanoq akilernissaanut, Siumut qanoq isummernersoq.

Aalisartunut ikiorsiissutit, corona pissutigalugu akiligassaq annertunerusoq aamma Kim Kielsenip nipisattassiinermi inissisimanera.

Sammisat tamakku Inatsisartuni ilaasortat paaserusuppaat, Siumup qanoq isummerfiginerai.

Naalakkersuisut siulittaasuata ammaanermi oqalugiaataa tunngavigalugu Inatsisartut ullumi oqallipput.

Oqallinnerlu sivitsuussinnaannguatsiarpoq, aammalu corona nipisattassiinerlu initungaatsiassagunarlutik. Siumumit oqaaseqartartoq, Karl-Kristian Kruse oqaluttarfimmi oqalungiareermat, sammisat taakku pillugit arlaleriarluni aperineqarpoq.

Nipisaat pillugit IA-p soqutiginninnera

Pingaartumik Inuit Ataqatigiinnit siulittaasup Múte B. Egedep aamma Aqqaluaq Biilmannd Egedep paaserusulluinnarpaat, nipisattassiineq pillugu suliami Siumut qanoq isummernersoq:

- Unaana paaserusukkinga, Naalakkersuisut Siulittaasuata nipisattassiinermi attuumassuteqarpallaarsimasinnaaneranut misissuineq Siumumit qanoq isummerfigineqarnersoq, Aqqaluaq Biilmann Egede aperivoq.

- Uanga eqqartuussisutut inississanngilanga inatsisaatsuliortoqarsimasinnaanera pillugu. Taama isumaqartoqarpat, taama oqartussanut eqqortunut ingerlatinneqassaaq, Karl-Kristian Kruse akivoq.

Tillie Martinusenip erseqqissarpaa Inatsisartut tassaasut oqartussaanerusut, Kukkunersiuinermullu Ataatsimiititaliap Naalakkersuisut siulittaasut siulittaasuannik isornartorsiuinera pillugu naliliisussaasoq.

Aalisartunut ikiorsiissutit

Atassummit Siverth K. Heilmannip aamma Partii Naleqqamit Hans Enoksenip paaserusuppaa aalisartut qanoq ikiorserneqassanersut.

- Aalisartut toqqaannartumik aningaasanik ikiorserneqarnissaat inissaminiinngitsoq isumaqarsinnaavunga. Kisianni orsussamut tapiineq aamma ajornartoornermi ikiorsiissutit atorneqarsinnaasut periarfissaasinnaasutut isigaakka, Karl-Kristian Kruse oqarpoq.

Suleqatigiissitsisunit Tillie Martinussenip paaserusuppaa akiligassaq coronamut immikkut tunngasoq qanoq akilerneqassanersoq. Ilanngullugu apeqqutigaa mittarfiit, mittarfissuit ikiorsiissutillu assigiinngitsut qanoq aningaasalersorneqassasut, coronao ajornartoortitsinera taama qanitsigitillugu.

- Nunatsinni ineriartortoqarnissaa kissaatigaarput. Sanaartornerit assigiinngitsut, soorlu kollegialiornerit, suliffissaqartitsipput isertitsissutaasinnaallutillu. Aamma aalisartut ikiorsiiffigineqarnissaat inissaminiippoq, inuussutissarsiut nunatsinni pingaarnerpaammatm Karl-Kristian Kruse oqarpoq, nunaniillu allanit atorniarsinnaaneq periarfissatut taallugu.

Siumumi oqaaseqartartup oqalungiummini Tiliup aamma MIO-p sulineri pingaaruteqarluartutut taakkartorpai, aammali perorsaasut isumaqatiginninniarneranni angusaqarluarnissaannik kissaassilluni.

- Inuk qitiutillugu sulineq ukkatarinerusariaqarparput. Innuttaasut sullinneqarnerat politikkikkut ukkanneqarnerusariaqarpoq, isumaginninnermi perorsaasullu sulineranni pitsanngorsaanerit ingerlanneqartariaqarput, Karl-Kristian Kruse perorsaasut akissarsiaat pillugit aperineqarami oqarpoq.

Powered by Labrador CMS