Amernik amigaateqarnerup Great Greenland tatisimavaa

Great Greenland 2017-imi 1,8 millionit koruuninik amigartooruteqarpoq. Puisip amii tunineqartut ikleriarnerat (Københavnimi annertuumik tillinniartoqarnerisa saniatigut) aningaasaqarnerup ajornartorsiorfiuneranut malunnaatilimmik pissutaavoq.

Ingerlatseqatigiiffimmi siulittaasunngorlaap Juliane Henningsenip ammit amerlanerusut tunineqalernissaat salliutinniarpaa.

AG taama allaaserisaqarpoq.

- Tassa siullermik maannakkut amerninik tunisinermi akinik qaffaanerit pinikuupput aammalu 100-ut sinnerlugit tunisigaanni qaffaanerit ingerlanikuullutik qaffasinnerpaamik amermut ataatsimut 450 koruuni allaavigineqarluni. Tassanilu natsiit aataallu amii pineqarput. Taava tunitsiviit amerlanerit ammarnissaat sulissutigineqarpoq. Kisianni aappaagu sullissinissamut isumaqatigiissut nutaaq atulerpat ammaanissaq aallaaviulluni. Uani assersuutigineqarsinnaapput assersuutigalugu Upernaviup eqqaani Tasiusaq Aappilattoq Ilulissallu. Taakkua takussutissiipput aalisartoqarluaraluartoq puisinniarneq amernillu tunisineq suli ingerlasoq.

Tamatuma saniatigut sunngiffimmi piniartut amernik tunisisinnaanngortinnissaannut politikerinut kajumissaarivoq. Manna tikillugu aalisarnermut piniarnermut naalakkersuisup, Erik Jensenip (S), isumassarsiaq tamanna akerleraa.

Juliane Henningsenip apersorneqarnera tamaat AG-mi atuaruk:

AG Uge 29 2018

Klik her for at læse