Amerluutilimmut anaanaq: Danmarkimut nuunnissaq eqqarsaatigaarput
Molly, qulinik qaammatilik amerluuteqartorlu, Danmarkimi nakorsiunneqareernermini nakorsaaserneqarami amigissilertupallappoq. Anaanaa Elvira Olesen Danmarkimut aallarsimavoq panini ikioqqullugu.
Amerlunnerit, ammip panernera, unnuakkut qiasoorneq ungillerinerlu. Qaammatini arfineq-marlunni.
Elvira Olesen Nuummeersup panimi inunngoreernerani sulinngiffeqarnermi tamanna misigisimavaa. Maanna paninilu Københavnimiipput, panini amerluttuumat Danmarkimut nakorsiussimavaa.
- Anaanatut iliuusissaarunnaqaaq. Eqqarsaatigilerakku paniga ikiorniarlugu qanoq iliorsinnaanerlunga. Nunatsinni peqqinnissaqarfimmi misigisimavara ikiorneqarluanngitsugut, Elvira Olesen oqaluttuarpoq.
Elvira Olesen anaanat marluk allat assigalugit piffissami kingullermi Danmarkimut aallartunut ilaavoq. Meeqqap amerluutai nunatsinni iluarsineqarsimanngitsut pissutigalugit Danmarkimi napparsimmaveqarfimmi maanna ikiorneqarpoq.
Elvira Olesenip amerluuteqarneq sapigaqartuunerlu ilisimaarilluarpai. Nammineq meeraanermini amerluuteqartuusimavoq. Maannalu meeqqat ataataat ernerallu sapigaqarlutillu aamma amerluuteqartuupput.
Ullualuinnarni pitsaanerulertoq
Assit malunnaatilimmik nikeriarsimapput. Assermi siullermi Molly nalavoq, timaalu aappalorujuttunik amerluuteqarpoq. Assip aappaani Molly, Danmarkimi nakorsarneqalereerluni assiliteqqissimavoq, amigissisimangaatsiarlunilu.
- Danmarkimut tikikkatta Mollylu nakorsiukkakku nakorsap Mollyp amerluutai annilaarutigai. Maanna Bispebjergimi amilerisunut attaveqalerpugut, tassanilu nakorsat oqaluttuarput meeqqat marluk nunatsinneersut aamma tikeqqammersimasut, Elvira Olesen oqaluttuarpoq.
- Oqiliallattorujussuuvunga paniga pitsaasumik nakorsarneqarmat. Nakorsaatigiligaa iluaqutaasoq takusinnaavarput. Ilinniartinneqarpunga tanittarnissaanik, tarnutissaanillu atortagassatsinnik tunineqarluta, Elvira Olesen oqaluttuarpoq.
Molly 3. marts nakorsiaqqissaaq, amerluutaalu pillugit DNA atorlugu misissorneqarluni. Anaanaasoq Sermitsiaq.AG-mut oqaluttuarpoq aappanilu Danmarkimut nuunnissaq eqqarsaatigilersimallugu:
- Danmarkimut nuunnissamut periarfissat misissorniarpagut, takusinnaavarpummi nunatsinni peqqinnissaqarfimmiit Danmarkimi peqqinnissaqarfik pitsaanerujussuarmik sullissisoq. Danmarkimut nuunnissaq misissussavarput meeqqagut pillugit, Elvira Olesen oqaluttuarpoq.