Amerlanerusut ilinniagaqartalersut

Innuttaasut 16-it 74-illu akornanni ukioqartut 40 procentii meeqqat atuarfiata saniatigut allamik ilinniagaqarput. Ukiut qulit ingerlaneranni ilinniagaqarsimasut 7,8 procentimik amerleriaateqarput. Naalakkersuisuugallartoq nuannaarutiginnippoq.

Amerlanerusut meeqqat atuarfianik naammassinnereernerup kingorna ilinniaqqiffinnut ingerlaqqittarput.

Naatsorsueqqissaartarfimmit kisitsisit takutippaat innuttaasut 2019-imi 16-74-it akornanni ukiullit 40 procentiingajaat meeqqat atuarfianit qaffasinnerusumik ilinniagaqarsimasut. Ukiut qulit ingerlaneranni tamanna 7,8 procentinik qaffariarneruvoq.

Naalakkersuisut nittartakkaminni taama ilisimatitsipput.

Naatsorsuinerit takutippaat:

  • 11,7 procent ingerlaqqiffiusumik ilinniagaqarput
  • 27,8 procent ilinniarnertuunngorniarfimmi inuussutissarsiutitigullu ilinniagaqartut imaluunniit ilassutaasussamik pikkorissarsimasuupput

- Naatsorsueqqissaartarfiup kisitsisit saqqummiussai kusanaqaat. Ilinniagaqarsimassutsip qaffannissaanut sivisuumik uteriitsumillu sulissuteqaqqaarnissaq qularutissaanngilaq, kisitsisilli takutippaat ilinniagaqarsimassutsip qaffannissaanut anguniagaqarnitsinni pitsaasumik siuariaateqartoqarsimasoq ilinniarfigilluarsinnaassatsinnik, Ilinniartitaanermut, Kultureqarnermut Ilageeqarnermullu Naalakkersuisuugallartoq Karl Frederik Danielsen oqarpoq.

Arnat ilinniarsimasut amerlanerusut

Naatsorsueqqissaartarfiup kisitsisaataasa takutippaat arnat angutinit amerlanerusut ilinniaqqittartut.

2019-imi arnat 42,8 procentii angutillu 36,5 procentii inuusuttunut ilinniarfinni ingerlaqqiffiusumilluunniit ilinniarfimmi ilinniagaqarsimapput .

- Innuttaasut ilinniarsimanerisa allanngornerisa taamaallaat piginnaasaqalersitsisumik ilinniagaqarsimanersut ersersinngilaat Kalaallit Nunaannut nuuttartut aamma Kalaallit Nunaannit nuuttartut ilinniarsimasaasa qaffasissusaat aamma sunnertarpaat. Ilinniagaqarsimassutsilli qaffasissusaanut nalunaarsuutit innuttaasunut inuusunnerusunut nalinginnaasumik matussusiinerupput, Namminersorlutik Oqartussat tusagassiorfinnut nalunaarutaanni allassimavoq.

- Suli suliassaqarpugut taamaattorli angusarissaarnerit Naatsorsueqqissaartarfimmit takutinneqartut taakkunanngalu misittakkat ersersinnissaat pingaaruteqarpoq, Karl Frederik Danielsen oqarpoq.

Powered by Labrador CMS