Skip to main content

Amerlanerussuteqartut ataasinngorpat Danmark ikiunissamik qinnuiginiarpaat

Meeqqat eqqugaaratarsinnaasut ikiorneqarnissaanut Danmarkip ikiunissaanut Naalakkersuisut pinngitsaalillugit qinnuiginninnissaannut siunnersuut immikkut ittoq, Inatsisartut suliarissavaat.

Tasiilami aamma nunap sinnerani inuusuttut akornann kinguaassiutitigut atornerluinernut, sumiginnaanermut imminullu toquttarnermut suliniuteqarnermut Danmarkip ikiuigasuarnissaanut qinnuiginninnissamut siunnersuut Inatsisartut ataasinngornermi oqaluuserissavaat.

Suleqatigiissitsisut, IA-p, Atassutip, Demokraatit aamma Partii Naleqqap ataatsimoorlutik siunnersuut saqqummiussaat amerlanerussuteqarfigineqarnissaa qulakkeerneqareerpoq.

Piviusulersaarusiap ‘Byen hvor børn forsvinder’ sammisaq politikkikkut oqaluuserisassani siullerpaanngorlugu inisseqqippaa.

- Tassami piffissami kingullermi takusagut tusakkagullu sakkortupput, tamnnalu aamma tusagaq nunap sinnerani allaaneruallaanngilaq, siunnersuummut tunngavilersuummi tamanna oqaatigineqarpoq.

- Partiit amerlanerussuteqartut tusagassiorfinnut nalunaarutaanni piumasarineqarpoq danskit Naalakkersuisui peqatigalugit suliassat piaartumik aallartinneqassasut. Tamannalu Naalakkersuisutta piaartumik kinguarsaanertaqanngitsumik aallartittariaqarpaat. Tassami illersorneqarsinnaanngilaq meeqqat angajoqqaaminnik sumiginnakkat, aammalu kinguaassiutimikkut atornerlunnteqartut kigaappallaamik sullinneqarnerat isiginnaaginnassallugu. Naalakkersuinikkut suligasuartoqarnissaa inassutigaarput.

Siunnersuut immikkut ittumik oqaluuserisassanut ilanngunneqarpoq, immikkut pisoqarnera pissutigalugu siunnersuummik tunniussinissamik piffissaliunneqartut nalinginnaasut avaqqunneqarnissaat piumasarimmassuk.

Kommunit akisussaaffimmik arsaarneqarnissaat isumaliutigigaat

Peqqissutsimut isumaginninnermullu naalakkersuisup, Martha Abelsenip (S) maannakkorpiaq Danmarkimit ikioqqunissaq arlaleriarluni itigartitsissutigaa.

- Uanga pingaartippara erseqqissaatigissallugu, piffissami sukkulluunniit qallunaat naalagaaffiannit pisortatigoortumik ikiuinissaq imaluunniit tapersiinissaq pillugu saaffiginnittoqarsimanngitsoq. Taamaammat Naalakkersuisut Danmarkimit ikiorneqarnissamik piviusumik neqeroorummik itigartitsinngisaannarsimapput, taanna tusagassiuutinut nalunaarummi taama oqarpoq.

Tamatuma saniatigut kommunit suliassamik kivitsisinnaanngippata akisussaaffimmik arsaarnissaannut piareersimavoq.

- Naalakkersuisut qallunaat naalagaaffiat meeqqanut inuusuttunullu suliassaqarfimmi suliassat pillugit kivitsinissamut ikiueqqullugit qinnuigippassuk, taava soorunami apererusunnassaaq: Kommunit suliassamik kivitsisinnaappat? Nunami politikeriusugut tamanna pillugu isummertariaqarpugut.  

- Kommunip suliassaq kivissinnaanngippagu, taava soorunami Naalakkersuisut iliuuseqassapput. Maanna isumaginninneq pillugu malittarisassanik tamanik ilaanilluunniit kommunip ingerlatsineranik atorunnaarsitsinissamut inatsisitigut periarfissaqareerpoq,  kommunip pisussaatitaaffiinik imaluunniit innuttaasut pisinnaatitaaffiinik annertuumik sumiginnaasoqarsimappat.

Sulilu annerusumik iliuuseqarnissamut piareersimavoq.

- Tamatuma kinguneratut suliassaqarfik tamaat pillugu qitiusumit ingerlatsilernissaq isumaliutersuutigineqalersinnaavoq, taamaalilluni suliassaqarfimmik kommunit ingerlatsinerat tiguneqarluni. 

Danmarkip ikiunissaa pillugu siunnersuut ataasinngorpat siullermeerneqassaaq, juunip sisamaannilu naammassillugu akuerineqarsinnaalluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER