Amerikarmiut timmisartuaraat Kulusummut ajoqquteqarluni mittariaqartoq
Timmisartuaraq Nuummit Reykjavikiliartilluni motorikkut ajoqquteqalermat Kulusummut mittariaqalersimavoq uani sapaatip akunnerani. Timmisartuaraq Kulusummut ajunngitsumik mippoq.
Timmisartuaraq USA-meersoq motorikkut ajoqquteqalersimasoq Issittumi Sakkutuut Naviarimit nalunaarfigineqarput marlunngormat.
Timmisartuaraq ataatsimik motoreqarpoq, Nuummit Reykjavikiliarnermini motoria ajortissimalluni.
- Tasiilap ungasinngisaaniitilluni, sermersuaq qulaatsillugu motorikkut ajoqquteqalerpoq, Issittumi Sakkutuut Facebookikkut allapput.
Mittarfik sumiinnersoq ilisimanngikkaa
Timmisartuaqqami aquttoq Issittumi Sakkutuunit siunnersorneqarpoq Kulusummut mittariaqartoq.
Issittumi Sakkuttuut timmisartuat Challenger ikiuuppoq, tassami timmisartuaqqami aquttup Kulusummi mittarfik sumiinnersoq ilisimasimanngilaa.
Ajunngitsumik mippoq
- Timmisartuaraq ajutuussappat aquttoq piareersimasariaqartoq nalunaarfigineqarpoq, tassani immamut meriataassagaluarpat isumannaallisaanikkut ikiorsiisoqarnissaanik nalunaarfigineqarluni, nalunaarutigineqarpoq.
Challengeri Kulusummut suli apuutinngitsoq nalunaarfigineqarput timmisartuaraq Kulusummut ajunngitsumik missimasoq.