ilisimatusarneq

Amerikarmiut tapiissuteqarnerisigut nunatta allannguutai nutaamik ilisimatusarfigineqassapput

Sinerissami ilisimatuut suliniutaanni nutaami inuusuttut utoqqaallu akulerutsinneqassapput

Illorsuarnut tikittut

Ilisimatusarfik, amerikami universitetit marluk Rochester Institute of Technology aamma Binghamton University, suleqatigalugit ilisimatusarnissaminut USA-p National Science Foundationimit aningaasaliiffigineqarsimavoq.

Assiliisoq amerikarmiu nunatsinniissimasoq

Suliniut ilimatooqatigiit nunanit tamalaaneersut suleqatigiillutik ingerlatissavaat, Ilisimatusarfimmit marluk Jette Rygaard aamma Axel Jeremiassen, USA-millu marluk Denis Definbaugh aamma Susan Vanek.

Suliniut aallaaveqarpoq assiliisup Rockwell Kents-ip 1930-ikkunni Kalaallit Nunaanni suliarisimasaanik.

Inuit akulerutsinneqassapput

Amerikarmiup taassuma Kalaallit Nunaanniissimanera ilisimatusarfigineqassaaq, Kentsillu assilisai eqqumiitsuliaalu atorneqassapput 1930-ikkunnit ullumimut Kalaallit Nunaanni allannguutit oqaluuserineqarnerannut aallaavittut.

Ilisimatuut illoqarfiit nunaqarfiillu suliniummut attuumassuteqartut upernaaru tikeraassavaat suliniut sumiiffinni tamakkunani innuttaasunik oqaloqatigiissutiginiarlugu, illoqarfiillu tassaapput Illorsuit, Uummannaq, Sisimiut Nuullu.

Innuttaasut paasissutissiissutaat suliniutip siunertaata ineriartorteqqinneqarnissaanut apersuinernullu atorneqassapput, suliarlu tamanna ukiaru aallartinneqassaaq.

Periutsit assigiinngitsut

Meeqqat inuusuttullu suliniutip ilagai pingaarutillit.

Illoqarfinni tamani meeqqanik inuusuttunillu assiliinermik sammisaqartitsisoqassaaq, tamatumani assileeriaatsinik ilinniartillugit, assilisaallu saqqummersinneqarumaarput.

Kitaata sineriaani ilisimatusarnermi tamakkua tamarmik isigisanut, oqaluttuarisaanermut inuillu allannguutaannut takussutissiissapput ukiut 70-90-it qaangiunneranni sumiiffiit qanoq ineriartorsimanersut.

Powered by Labrador CMS