Amerikamiut qimaannagaannik saliineq ingerlateqqinneqartoq
Kommuneqarfik Sermersuumi Ingerlatsinermut Avatangiisinullu Immikkoortortaqarfik Sermersuup kommuneqarfiata iluani amerikamiut qimataannik saliineq ingerlateqqippaa, naatsorsuutigalugulu Marrarmi saliineq ukioq manna naammassineqassasoq.
Kommuneqarfik Sermersooq Sermersuup kommuneqarfiata iluani amerikamiut qimataannik saliinissamut kalaallinit qallunaanillu aqutsigisoqatigiinnik pilersitsisuusutut sulinini nangeqqippaa.
Ukioq manna saliinermi sumiiffit pingasut ukua qitiutinneqassapput: Whalerus Bay Ittoqqortoormiit eqqaaniittoq, Ikateq Tasiilap eqqaani aamma Nuup kujataaniittoq Marraq.
Siorna aasakkut Marrarmi Ikatermilu saliineq aallartinneqarpoq. Kommuneqarfik Sermersuumi Avatangiisinut Immikkoortortaqarfimmi pisortaq Frank Rasmussen oqaluttuarpoq, Marrarmi saliinerup ukioq manna naammassineqarnissaa neriuutigineqartoq, aamma Ikatermi saliineq ukiumik ataatsimik sivitsorneqartariaqartoq.
Nuna mingutsinneqarsimasoq qulaajaaffigineqassasoq
Nunap qaaginnaanut qimaannakkat allaapput, nunallu iluaniittut allaallutik.
- Inuit ilisimasallit siorna saliiffissaneeqatigisimavavut, taakku maannakkut misissuleruttorpaat, nunamik mingutsinneqarsimasumik sumi nassaartoqarnissaanik naatsorsuuteqartoqarsinnaanersoq, Frank Rasmussen oqaluttuarpoq.
- Nunap assanneqarnerani suni nassaarsinnaanerput uannut assut soqutiginarsimavoq. 180 millioner koruunit nunap qaavaniittunik saliinissamut immikkoortinneqarsimasut naammassangatinneqarput, nunalli iluaniittunik ilanngussilluni saliinissamut naammaqqajanngillat, taanna oqarpoq.
Tamarmik piiarneqassanngitsut
Ikatermi frilandsmuseumeqalersinnaaneq maannakkorpiaq sulissutiginearpoq, tassani innuttaasut suliamut aamma peqataatinneqassapput, Frank Rasmussen oqaluttuarpoq.
- Maskiinat qamutillillu batteriivi uninngatiinnarneqassapput, amerikamiut tamaaniissimanerannut takutitassiassatut. Sakkut kaavittui (tromle) asbestillu aamma ulorianaatillit allat piiarniarsarissavavut, inuit isumannaatsumik sumiiffimmiittarnissaat angunirlugu. Ullumikkut isumannaatsumik sumiiffimmiittoqarsinnaanngilaq, taanna oqarpoq.
Kingullermik isumannaallissanissaq pillugu isumaqatigiittoqarmat 180 millionr koruunit immikkoortinneqarsimapput. Saliilluni suliaqarneq ukiuni arlalinni ingerlanneqassangatinneqarpoq.
Suliniummik aqutsisoqatigiit innuttaqarput, Kommuneqarfik Sermersuumeersut saniatigut Namminersorlutik Oqartussani Pinngortitamut Avatangiisinullu Naalakkersuisoqarfimmeersunik kiisalu Danmarkimi Illersornissamut Ministeeriaqarfimmeersunik aamma Avatangiisinut Inuussutissanullu Ministeeriaqarfimmeersunik.