Amerikamiut isummersuisarfiata kalaallit qinersinerat nakkutigaat
Center for Strategic and International Studiesip Inatsisartunut qinersinerup misissueqqissaarfigineqarneranik saqqummiussivoq.
Nunatsinni qinersineq USA-mut pingaaruteqarpoq. Heather A. Conlay aamma Jon Rahbek-Clemmensen isummersuisarfiup ataqqineqartumut Center for Strategic and International Studiesimut (CSIS) misissueqqissaarnerminni taama tunngavilersuuteqarput.
Pituffik qinersinermut soqutiginninnissamut pissutaasut ilagaat, taakku allaaserinnittut marluk isumaqarput. Aappaa CSIS-imi Senior Vicepresidentiuvoq Europamut, Eurasiamut aamma Issittumut akisussaasoq aappaalu Forsvarsakadememietimi lektoriulluni.
Kisianni aamma allanik soqutiginartoqarpoq.
- Kalaallit mittarfii umiarsualiviilu Atlantikup avannaani silaannakkut imaatigullu alapernaarsuinermi aalajangiisuusinnaapput, aqqartartunullu nakkutilliissutit sinerissami inississorneqarsinnaallutik, misissueqqissaarnermi tamanna oqaatigineqarpoq.
Namminiilivinnissaq pillugu oqallinneq
Namminiilivinnissaq pillugu oqallinnerup qineqqusaarnermi qanoq sunniuteqarnissaa misissueqqissaarnermi ingammik tikkuarneqarpoq. Aningaasaqarneq maannakkorpiaq piaartumik namminiilivinnissamut tulluanngitsoq taakku marluk allapput, kisianni tamanna kinamiut Kalaallit Nunaanni aningaasaleerusussuseqarnerannik allanngorsinnaanera tamatuma saniatigut oqaatigaat. Siumumi aamma Inuit Ataqatigiinni aqutsisut namminiilivinnissaq pillugu piviusorsiortumik aalajangiusimapput, Nunatta Qitornaasa ingammik oqallisigineqartut allanngortissinnaagaat allaaserinnittut taakku marluk isumaqarput.
Vittus Qujaukitsoq Danmarkimut USA-mullu sakkortuumik pissusilersornermini qinersisartunit taperserneqassaguni, USA-p Kalaallit Nunaanni inissisimanera aamma danskit kalaallillu atassuteqarfiginerat pisariusunngortissinnaavaat, Heather A. Conlay aamma Jon Rahbek-Clemmensen naliliipput.