Amerikamiut illersornissaqarfiat mittarfinnut aningaasaliiniarpoq

Amerikamiut aningaasaliinissamut nalunaarutaat Naalakkersuisut tikilluaqquaat

Amerikamiut illersornissaqarfiat Nunatsinni aningaasaliinissaminut piareersimavoq. Amerikamiut Københavnimi aallartitaqarfiata Facebookimi qanoq pilersaarneq pillugu nalunaarutaani tamanna atuarneqarsinnaavoq.

- Naalunaarutip matuma Amerikami illersornissamut ministeriaqarfiup Kalaallit Nunaanni aningaasaliinissamut soqutiginninnera uppernarsarpaa, tamatuma nunap immikkoortuani isumannaallisaaneq nukittorsarsinnaavaa, eqqortumik qisuariarnissaq nukittorsarlugu, aamma nunap immikkoortuani eqqissisimaneq attallugu, sakkutuunit sakkutuujunngitsunillu atorsinnaassalluni, nalunaarummi tamanna oqaatigineqarpoq, taanna amerikamiut illersornissamut ministeriannit John Roodimit atsiorneqarsimavoq.

Silaannakkut angallannermi attaveqaatinut aningaasaliinissamut periarfissat ilaatigut misissorneqassasut, nalunaarummi atuarneqarsinnaavoq. Mittarfiit sorliit pineqarnersut erseqqissumik oqaatigineqanngilaq, kisianni sakkutuujunngitsunut sakkutuunullu atorsinnaasoq oqaatigeqqinneqarpoq.

- Amerikamiut siunniussaminnik nalunaarutaat ilassilluarparput amerikamiullu mittarfinnut tunngassuteqartunik aningaasaleeqataasinnaanerinut periarfissat ataasiakkaat eqqartornissaanut qilanaalereerluta. Siunissami illuatungeriinnut iluaqusiisinnaasunik oqaloqatigiilluarnissaq Naalakkersuisut pingaartippaat. Tassunga tunngatillugu amerikamiut siunniussaminnik nalunaarutaat suliniutissatut ajunngilluinnartutut tiguarput Ilinniartitaanermut, Kulturimut, Ilageeqarnermut Nunanullu Allanut Naalakkersuisoq Vivian Motzfeldt tusagassiuutinut nalunaarummi allappoq.

Ataatsimiinnerit isumaqatigiissutigineqanngitsut

Nalunaarummi allaqqasumit, tassanngaannaq Twitterimut aamma Facebookimut ivertinneqartumit annerusumik ilisimasaqaratik Nunatsinni nunanut allanut tunngasunut naalakkersuisoqarfik ilisimatitsivoq. Amerikamiut aningaasaliinissaminnut isumaliutersuuteqarnerat itisilertissinnaaniarlugu, Amerikamiunik ataatsimeeqateqarnissamut maannamut suli isumaqatigiissusiortoqarsimanngilaq.

- Nunarsuaq tamakkerlugu politikki aallaavigalugu Issittoq pingaaruteqaleraluttuinnarpoq. USA-p Kalaallit Nunaanni sakkutooqarfeqarnermigut illersornissamut tunngatillugu suleqatigiinneq akunnitsinni illersoqatigiinnissatsinnut tapertaasoq ilutigalugulu issittup saqitsaaffiunngitsutut inissisimajuarnissaanut tapertaasoq pingaartittorujussuuarput nunanut allanut ministeri Anders Samuelsen allappoq.

- Issittumi inuinnaat sakkutuullu siunissami amerliartornissaat eqqarsaatigalugu pineqartumi najuunnerup nakkutilliinerullu annertusineqarnissaa pisariaqassaaq. Danskit naalakkersuisuisa illersornissamut isumaqatigiissutaat 2023-p tungaanut atuuttussaq aqqutigalugu Issittumi najuunnerput annertusarsinnaassavarput. Issittumi apeqqutinut tunngatillugu USA-mik qanimut suleqateqarnerput aamma issittumi sakkutuut suliatigut piginnaasaannik nalinginnaasumik nukittorsaanissaq pingaartittorujussuuavut illersornissamut ministeri Claus Hjort Frederiksen taamak oqarpoq.

Powered by Labrador CMS