Amerikamiut eqqagaat

Kangerlussuup eqqaavissuani Kellyvillemiit eqqakkat ulapputigineqareersimalerput. Ikuallaasoqareernerata kingorna savimerngit, errorsivikut, erruivikut kissarsuutikullu amerlasuut kiserngorupput. Amerikamiut eqqagaasa eqqaavissuarmi ikuallanneqarsinnaanerinut akuersissummik tunniussisoqarsimanngilarooq.

Saviminerpassuit Kellyvillemeersut Kangerlussuup maanna eqqaavissuaniipput.

Illuliornermi atortukut igitallu, soorlu biilit ineqarfiutigisut, amerikamiut ilisimatusarfigisimasaanneersut Kellyvillemeersut Kangerlussuup eqqaavissualiaanneqarsimaneri ikuallanneqarlutillu najugaqartunut akornutaasumik aviisimi oqaluttuaraarput.

Aviisi Sermitsiaq taama allappoq.

Kellyvillep isaternerata sanaartornermullu atortukut eqqarnissaannik Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmit akuersissummik tunniussisoqarsimanngilaq. Kangerlussuup eqqaavissuani ammaannartumik ikuallaanissaq aamma akuersissutigineqarsimanngilaq, Qeqqata Kommunianullu saaffiginneqqusipput taakkuummata igitassanik isumaginninnermik akisussaasuusut.

Kangerlussuup eqqaavissuanut suut iginneqartarnissaannik, suullu tunngavigineqartaneri kommuni aalajangersuineq ajortoq Qeqqata Kommuniani borgmesteri Malik Berthelsen (Siumut) nassuiaavoq. Eqqaavissuaq Namminersorlutik Oqartussat akisussaaffigimmassuk ulluinnarnilu ingerlanneqarnera Mittarfeqarfiit ingerlataralugu.

– Taamaammanuna Mittarfeqarfiit igitat immikkoortiterneqarnissaannik piumasaqaateqartussat. Kellyvillep isaterneqarnissaanut kommunip isaterinertut allatullu suliaq ingerlappaa. Isaterinissamut pilersaarusiortoqarlunilu igitat avatangiisinut mingutsitsisinnaasut immikkoortiterneqarnissaannik piumasaqartoqarsimaneranik tamanna isumaqarpoq. Taamatullu inissianik piginnittunut piumasarineqarluni igitat ulorianartut peqqissaarullugit eqqarneqarsimanissaat, Malik Berthelsen oqarpoq.

Aviisimi Sermitsiami atuarnerusinnaavutit. Aviisi uani pissarsiarisinnaavat:

Powered by Labrador CMS