Amerikamiunut isumaqatigiissut nutaaq suli nalorninartoq
Qaammataasakkut attaveqarneq pillugu Tusassip Amerikamiunut isumaqatigiissuteqarnissani naatsorsuutigaa, taamaalilluni ukiakkut 2023-miit Kalaallit Nunaanni sullitat tamarmik flatratemik interneteqalissallutik.
Ilimagisaq uniorlugu 2023-mi ukiakkumiit qaammataasakkut attaveqarneq pillugu Amerikamiunut isumaqatigiissuteqartoqassanngikkaluarpat, taava Tusass 2023-p kingornagut Pituffimmut attaveqarnikkut kiffartuussinissamik neqerooruteqassalluni tunngavissaqarunnaassaaq – internetiuppat, oqarasuaatiuppata, radio/TV imaluunniit allakkerinermi, Tusassimi pisortaaneq Kristian Reinert Davidsen oqarpoq.
Aviisi Sermitsiaq taama allappoq.
Tusassimi pisortaanerup naatsorsuutigaa qaammataasakkut attaveqarneq pillugu Amerikamiunut isumaqatigiissuteqassalluni, taamaalilluni Tusass Kalaallit Nunaanni tamarmi internet flatratemik neqerooruteqarsinnaalissalluni.
Sakkutooqarfimmi isumaqatigiissutit arlaqartut
Taama nalunaaruteqartoqarpoq Pituffimmi Amerikamiunut Tusassip aaqqiissuteqarnissaa pillugu Sermitsiamit Tusassimut apeqquteqartoqareersorlu.
Kristian Reinert Davidsen tassunga atatillugu nalunaarpoq Tusass Pituffimmut ataasiinnaanngitsumik arlalinnilli isumaqatigiissuteqartoq.
- Sumiiffimmi allakkatigut oqarasuaatitigullu sullitatta kiffartuunnissaat pineqarpoq. Taamaalilluni Tusassip ukiut ingerlanerini kiffartuussinera Vectrusip taassumalu siuliata akilertarsimavai.
- Isumaqatigiissutilli taakku ataavartut tassaanngillat annertunerpaamik kaaviiaartitsiviusut imaluunniit annertunerpaanik aningaasartuuteqarfiusut, erseqqissaavoq.
Aviisimi Sermitsiami atuarnerusinnaavutit. Aviisi uani pissarsiariuk: