Ambassadøri Nuummukarlunilu Ilulissanukassasoq

Tuluit Danmarkimi ambassadøriat Emma Hopkins sapaatip akunnerata tulliani Kalaallit Nunaannukassaaq.

Ambassadøri Emma Hopkings sapaatip akunnerata tulliani Nuummut Ilulissanullu tikeraarpat niuerneq, aalisarneq silallu pissusaata allanngoriartornera oqaluuserisassani pingaarnerpaatinneqassapput.

Tuluit Københavnimi ambassadeqarfianni sulisut peqatigalugit Tuluit Nunaata Kalaallillu Nunaata suleqatigiinnerat oqaluuseriniarlugu Naalakkersuisut arlallit ilaatigut ataatsimeeqatigineqassapput, Tuluit Nunaata Nordirlandillu akissaasersugaanngitsumik konsuliat Christian Keldsen tusagassiorfinnut nalunaaruteqarnermi ilisimatitsisvoq.

- Tikeraarnissap erseqqissisippaa Tuluit Nunaata Kalaallit Nunaannut
attaveqarnissaminik pingaartitsinera, tassunga ilanngullugit nunat taakku marluusut
akornanni niueqatigiinnerannut tunngasut.

- Ambassadør Hopkinsip tikeraarnissaa periarfissiivoq suleqatigiissutaasinnaasunik eqqartueqatigiinnissamut taamaattumillu ambassadørip eqqartueqatigiissutigerusuppai ilinniartitaanermut, inunnik isumaginninnermut, ilisimatuussutsimut ilisimatusarnermullu, silaannaap pissusaanut, inuussutissarsiornermut, aalisarnermut niueqatigiinnermullu tunngasut, nalunaarummi allassimavoq.

Tuluit Nunaata EU-mit aninerata malitsigisaanik Tuluit Nunaannik niueqatigiinnissamik isumaqatigiissutissaq piffissami sivisuumi Kalaallit Nunaannit isumaqatiginninniutigineqarsimavoq. Naalakkersuisut Siulittaasuta Múte B. Egedep (IA) ambassadørit juunip qaammataani nunat taakku marluk isumaqatigiissutaat oqaluuseriniarlugu naapissimavaa.

Silap pissusaata allanngoriartornera pingaartinneqassasoq

Ambassadørip Naalakkersuisut sinniisaannik naapitsinissami saniatigut kattuffiit arlaqartut sinniisaat, soorlu ICC-p, UNICEF-ip, Kalaallit Nunaanni Inuit Pisinnaatitaaffiinut
Siunnersuisoqatigiit, Ilisimatusarfiup kiisalu Kalaallit Nunaanni Sulitsisut sinniisai naapikkusuppai.

Novembarimi COP26-qarnissaq Tuluit Nunaanni pisussaavoq, taamaammat ambassadørip tikeraarnermini silap pissusaata allanngoriartornerata Kalaallit Nunaannut suniutai aamma najukkami inuiaqatigiinnut qanoq sunniuteqarnersoq erseqqinnerusumik paaserusuppai.

- Ambassadør Hopkinsip ataatsimeeqatissarai Nunarsuarmioqatigiit Issittumi Ilisimatusartut, Greenland Climate Research Centre kiisalu Kalaallit Nunaanni Ilisimatusarnermi Ataatsimiittartoqatigiit, eqqartueqatigiissutiginiarlugit silaannaap allanngoriartornera, ilisimatusarneq nutaaliornerlu. Silaannaap allanngoriartorneranut tunngasut Tuluit Nunaata nunanut allanut politikkip iluani pingaartitarai COP26-p pigaluttuarnerani taamaammallu tamakkununnga tunngasut ambassadør Hopkinsip pingaartillugit sammerusukkai ilsimatitsissutigineqarpoq.

Powered by Labrador CMS