Amaqqut sumiffinni marlunni killeqanngitsumik pisarineqarsinnaapput

Naalakkersuisut aalajangerput aqutsiveqarfinni Qaanaami aamma Ittoqqortoormiini amaqqut amerlassusaannik naleqqussaaniarnermi pisassiissutinik amerlanerpaaffiliisoqassanngitsoq.

Inuussutissarsiutigalugu piniartut atuuttumik piniarnermut allagartallit tuttunniartillutik, umimmanniartillutik piniakkanillu allanik neqissaqarniarnermut pingaarutilinnik piniariartillutik amaqqunik naammattuuigunik pisaqarsinnaapput. Aqutsiveqarfinni marluusuni taakkunani amaqqut ukiumut pisarineqarsinnaasut amerlanerpaaffilerneqanngillat.

Naalakkersuisut tamanna aalajangersimavaat.

- Inuussutissarsiutigalugu piniartut amaqqunik naleqqussaanissamut periarfissinneqarnissaat siunertarineqarpoq, taamaaliornikkullu amaqqut piniakkanik, soorlu tuttunik, umimmannik aamma piniakkanik allanik, aqutsiveqarfinni Qaanaami aamma Ittoqqortoormiini neqissaqarniarnermut pingaaruteqarluinnartunik akornusiinerisa minnerpaaffinngortinnissaat, Aalisarnermut Piniarnermut Nunalerinermullu Naalakkersuisoqarfik tusagassiorfinnut nalunaaruteqarnermi ilisimatitsivoq.

Amaqqut najugaqarfinnut qanittumiittut pisarineqarsinnaasut

Amaqqut Qaanaami Ittoqqortoormiinilu piniartut siusinnerusukkut akornutaasarsimapput. Amaqqut pingaartumik inuussutissarsiutigalugu piniartut piniarnerannut akorngutaasinnaapput.

Amaqqunik pisassiisoqaneq ajoraluartoq, amaqqut pisarineqartut tamarmik kommunimut nalunaarutigineqarnissaat inatsisitigut pisussaaffiligaavoq, soorlu aamma toqunneqarsimasut uumassusilerituunut misissugassanngorlugit tunniunneqartussaasut.

- Nalunaarummi allatut ajornartumik iliortariaqarneq imaluunniit imminut illersortariaqarneq pillugu aalajangersagaqarpoq. Aalajangersagaq pineqartoq malillugu amaqqut inoqarfiit eqqaannut – tassa illoqarfiup imaluunniit nunaqarfiup killeqarfiannut 500 meterinik qaninnerusumik - imaluunniit inoqarfinnut pisut toqunneqarnissaat periarfissaavoq, naalakkersuisoqarfik ilisimatitsivoq.

Aalisarnermut, Piniarnermut Nunalerinermullu Naalakkersuisoqarfik tamanna pillugu maleruagassanik suliaqarpoq, taakkulu susassaqartunut tusarniaassutigineqassapput.

Powered by Labrador CMS