Aluu Airlines

Aluu Airlines: Akit ima appasitsippagut

Kalaallit timmisartuutileqatigiiffiat nutaaq ukioq kaajallallugu ulluinnarni angalasarnissani siunnerfigaa

Aluu Airlinesimi iluanaarniutigalugu pisortaq Kuno Fencker

Timmisartuutileqatigiiffik nutaaq kalaallinik ingerlanneqartoq Aluu Airlines timmisartuutileqatigiiffinnut unammillerniartoq, nersualaarneqaqattaarpoq.

Aluu Airlines A/S Air Greenlandimi timmisartortartuusimasumit Pele Brobergimit pigineqarpoq. Aluu Airlinesip angallassisalernissaanut isumaqatigiissutinik naammassisaqarniarluni ulluni makkunani ulapittorujussuusoq, Aluu Airlinesimi iluanaarniutigalugu pisortaq Kuno Fencker oqarpoq.

Timmisartuutileqatigiiffik Nuummi allaffeqassaaq. Assersuutigalugulu Nuummit Københavniliarnermut siumut utimullu 3.999 koruuninik akeqartitsiniarluni nalunaaruteqartareerluni ungasinngitsumi. Aki taanna akileraarutit tamaasa akilereerlugit inersimasumut akigisinneqassaaq.

Akinik qaammaasaqarneq ingerlatsilluarnerlu
- Kuno Fencker, akit qanoq taamatut appasitsigisinnaagamik?

- Akinik qaammaasaqarluarnikkut ingerlatsilluarnikkullu taamatut akeqartitsisoqarsinnaavoq. Pikkoriffigisagut aallutissavagut aamma suleqatigisartakkavut soorlu Mittarfeqarfiit atorluassavagut.

- Uuliap akiata appasinnera pissutaalluni taamatut siunnertaqarpisi? Uuliap akia qaffaqqippat aamma akinut tamanna sunniuteqassava?

- Nunarsuarmioqatitta niuernikkut akigititaat taamatut akeqartitsinitsinnut sunniuteqaqataapput, Kuno Fencker oqarpoq.

- Danmarkimut angallassisalernissassinnik siunnerfeqarnissi saniatigut aamma nunatsinni angallassisalerusuppusi. Sumut timmisartuussisassavisi? Akit aamma qanoq inissisimatinneqassappat?

- Kangerlussuarmi, Ilulissani Nuummilu timmisartunik angallassisalernissarput takorluugaraarput. Inniminniisinnaanerit saqqummiunneqariarpata akigitinneqartut nassuiaanneqarumaarput. Akigitinneqartut allanngorarsinnaasut saqqummiutissavagut, Ilulissanut Nuummut 1.399 koruuneqassalluni.

- Timmisartuutileqatigiiffiup paasinartumik ingerlatsinissaa sullissilluarnerlu Aluu Airlinesimit pingaartinneqartuupput. Kinguaattoortoqartillugu uniinnartoqartilluguluunniit Air Greenlandimut sanilliullugu qanoq suleriaaseqassavisi?

- Kiffartuussisarnerit pillugit annertunerusumik kingusinnerusukkut saqqummiunneqarumaarput.

Angalanermut sillimmasiineq
- Aluu Airlines angalanermut sillimmasiisarfimmut Rejsegarantifondenimut ilaasortaava?

- Suliamut pilersaarutitsinnut pingaaruteqartuuvoq. Isumaqatigiissut inisseriarpat nalunaaruteqarumaarpugut.

- Danmarkimut angallassinermi Air Greenlandimit qanoq allaanerusumik suleriuseqassavisi? Tassani nerisaqartitsinissat ilaasullu aliikkusersorneqarnissaat eqqarsaatigineqarput.

- Unammilleqatigiittoqarnera pissutaalluni oqaaseqarfigisinnaanngilara.

- Danmarkimut angallassinermi timmisartoq qanoq oqaaseqarfigisinnaaviuk? Timmisartoq qanga sanaajua aamma qanoq amerlatigisunik ilaasoqarsinnaava?

- Assigiinngitsunik isumaqatiginninniarpugut tamanna pillugu. Isumaqatigiissut inisseriarpat nalunaaruteqarumaarpugut.

- Nunatsinnimi timmisartoq angalasartussaq pillugu paasissutissaateqarpit?

- Timmisartup ATR-ip atorneqarnissaa siunnerfigineqarpoq. Kisianni isumaqatiginninniarnerit inerneri tamanna takutikkumaarpaat.

Taamaammat Aluu Airlinesimik taaguuteqarpoq
- Timmisartuutileqatigiiffinnik misilittagaqarluartunik sooruna unammillerpisi?

- Suliffeqarfittut periarfissalittut isigigatsigu aallartisaavugut. Aamma innuttaasut pitsaanerusunik akinik periarfissikkusukkatsigit. Aamma takornarialerinikkut pisatanillu assartuinikkut suleqataarusuppugut.

- Aluu Airlines aktieselskabiuvoq. Kikkut suleqatiginerlugit oqaatigisinnaaviuk?

- Aluu Airlines A/S 100 procentimik Pele Brobergimit pigineqarpoq.

- Patajaatsumik ajutooriataarsinnaaner­mullu sillimaffiginnittumik aningaasaliiso­qarlusi oqaaseqartareerpusi. Aamma allat suut oqaatigisinnaavigit?

- Suliamut tunngasut akuersissutigineqareersut oqaatigisinnaavara.

Ullut tamaasa ukioq kaajallallugu
- Ukioq naallugu angallassisassamaarpisi?

- Ulluinnaat angallassiffigisarniarlugit naatsorsuutigaarput - ukioq kaajallallugu.

- Qanormi akulikitsigisumik Danmarkimut angallassisassavisi?

- Aallaqqaataani ataasinngornermit tallimanngorneq ilanngullugu.

- Aluu Airlinesimit naatsorsuutigisinnaavisiuk inniminniinernik tunisaqarsinnaassallusi qaammatip naaneranit kiisalu juunip aallaqqaataanit angallassisalernissarsi aamma naatsorsuutigineqarsinnaava?

- Inniminniisoqarsinnaalissaaq januaarip 31-anit. Inuit namminneerlutik aalajangersinnaalissavaat ulloq suna angalaffiginiarnerlugu. Timmisartuusseqqaarnissarput juunip aallaqqaataani pissasoq naatsorsuutigaarput, Aluu Airlinesimi iluanaarniutigalugu pisortaq Kuno Fencker oqarpoq.

Aluu Airlines pillugu allaaserineqartut aviisimi Sermitsiami atuarneqarsinnaapput. Aviisi ataani pisiariuk:

Powered by Labrador CMS