timmisartuutileqatigiiffiit
Aluu Airlines aamma Greenland Express Air billetsinik tuniniaanissartik kinguartippaat
Oqartussanit akuerineqarnissartik timmisartuutileqatigiiffiit utaqqigallarpaat
Nunatta iluani timmisartuussinikkut kiisalu Nunatsinnit Danmarkimut silaannakkut angallassinikkut akitigut unammilleqatigiittoqalerpoq. Timmisartuutileqatigiiffiit Greenland Express Air aamma kingusiinnaatigut Aluu Airlines nalunaaruteqartareerput Air Greenlandimut Air Icelandimullu unammillerniarliutik.
Greenland Express Air aamma Aluu Airlines nalunaarput akuersissuteqannginnertik pissutigalugu billetsinik tuniniaanertik suli aallartissinnaanagu.
- Tassani akitigut qanoq inissisimanerluta angallassinissagullu qanoq pilersaarutiginerlugit nassiussinikuuvugut kisianni Silaannakkut angallannermi aqutsisoqarfimmit akuersissutinik suli tigusaqanngilagut. Taamaattumik billetsinik tuniniaanerput kinguartippoq. Akitigut inissisimanigut saqqummiutereeraluarpagut, paatsoortoqannginnissaali anguniarlugu aatsaat Silaannakkut angallannermut aqutsisoqarfimmit akuersissummik tigusaqareerutta billetsit pisiarineqarsinnaalissapput, Aluu Airlinesimit nalunaarutigineqarpoq.
Unammillertaasut Greenland Express Air aamma akuersissutinik utaqqisaqarput.
- Billetsinik innimiisinnaanerup kinguartinneqarnera ajuusaarutigalugu nalunaarutigaarput. Nunatta iluani angallassisinnaanerput pillugu Namminersorlutik Oqartussanit akineqarnissarput suli utaqqimaarparput, Greenland Express Air Sermitsiaq.AG-mut nalunaaruteqarpoq. Billetsit sapaatip akunneri marluk qaangiuppata pisiarineqarsinnaalissasut aamma nalunaarutigineqarpoq.