Alternativet: Danmarkip nunasiaateqarsimanermi pisimasut utoqqatsissutigisariaqarpai
Danmarkip naalagaaffia Kalaallit Nunaannut pisortatigoortumik utoqqatsertariaqartoq Alternativet isumaqarpoq
Nunasiaateqarnermi nalaani pisisasut utoqqatsissutaasariaqarput. Danskit partiivisa ilaat Alternativet ataasinngorpat saqqummiussassaani ilaatigut allaqqasoqarpoq.
- Danmarkip Kalaallit Nunaannut pisortatigoortumik utoqqatsissuteqartariaqarpoq, partiip Kalaallit Nunaannut oqaaseqartartua Roger Courage Matthisen Sermitsiaq.AG-mut oqarpoq.
Oqaatsit kusanartut kisimik utoqqatsissummi oqaatigineqassanngitsut aamma isumaqarpoq.
- Iliuuseqartoqartariaqarpoq nunap ineriartornissaanut iluaqutaasussamik. Niuernikkut ilinniartitaanikkulluunniit isumaqatigiissusiortoqarsinnaavoq, Roger Courage Matthisen oqarpoq.
Suna utoqqatsissutigineqassanersoq aamma erseqqittuusariaqartoq isumaqarpoq.
- Inoqarfiit matuneqarneri, meeqqat Danmarkiliartinneqarneri kingornalu Nuummut meeqqat illuannut nuutsinneqarneri iliuutsit kusananngitsut utoqqatsissutigineqartariaqarput, Roger Courage Matthisen oqarpoq.
1950-ikkunni 60-ikkunnilu pisut aamma utoqqatsissummi ilaasariaqartut isumaqartoq. Thulemi najugaqartut nuutsitaaneri aamma assigiinngisitsinerit tassani ilaasariaqartut partii isumaqarpoq.
- Danmarkip nunasiaateqarsimanera itisilerlugu misissorneqartariaqarpoq, taamaattumik Folketingip misissuinissaa qinnuigaarput susoqarpiarsimanersoq. Misissuineq naammassippat erseqqinnerulissaaq suut utoqqatsissutigineqassanersut, Roger Courage Matthisen oqarpoq.