Allatut isummerneq: Sanningasut piffissap ingerlanerani pisoqalillutik aserorsimapput
Ilagiinni ilaasortaq isumaqarpoq, iliveqarfimmi serlersaarisoqarsimanngitsoq.
Sermitsiaq.AG-mit marlunngornermi ullaakkut oqaluttuarineqarpoq, politiit Nuummi iliveqarfitoqqami serlersaarisimanermut takunnissimasinnaasunik ujaasisut.
Ileqarfik aqquserngit Noorlernut Saqqarliillu akornanniittoq illoqarfiup qeqqaniippoq.
Pigaartut pisortaata Jan Geislerip marlunngornermi ullup-qeqqanut ilisimatitsissutigaa, ilagiinni ilaasortaq ataaseq pineqartoq pillugu politiinut saaffiginnissimasoq.
Pigaartut pisortaata oqaatigaa, ilagiinni ilaasortap oqaluttuarisimagaa, sanningasut serlersaarfigineqarsimagunanngitsut, piffissalli ingerlanerani pisoqalillutik ajortissimasut.
- Nittaalaraangat sanningasut ilaat napisarput.
- Ilisimatitsissutai ilumuussappata suliaq unitsissavarput, taamaasimappammi serlersaarisoqarsimassanngilaq, Jan Geilser oqarpoq.
Ilaqutaasut ilerrit ajunngitsuunissaannut akisussaasuusut
Nuummi palasip Markus Olsenip sanningasut aserorsimanerat isoralugu KNRimut oqaatigisimavaa.
Taassuma Sermitsiaq.AG-mut nassuiaatigaa, iliveqarfimmi serlersaarisoqarsimanersoq qularuteqarani oqaatigisinnaanagu, nalunaarutigineqarsimasorli tunngavigalugu oqaaseqarsimalluni.
Markus Olsenip ilanngullugu oqaatigaa, toqusimasut ilaqutaasa iliveqarfimmi ilerrit ataasiakkaat ajunngitsuunissaannut akisussaasuusut, kommunili iliveqarfinni pissutsinut tamanut akisussaasuulluni.