Allattorsimaffik takujuk: Kina akissarsiaqqortunerua

Namminersorlutik Oqartussat suliffeqarfiutaanni pisortaanerit sisamat ukiumut millionilikkuutaanik aningaasarsiaqarlutik akissarsiaginnerpaapput. Ukiullu siuliini qanoq isertitaqarsimanersut ersinngilaq, tamatunnga ukiumut naatsorsuutit ersarissumik paasissutissiarineqartarsimannginnerannik pissuteqarpoq.

Isertitaqarnerpaaq

Michael Thinghuus Royal Greenlandiminngaanneersoq sisamanik aqutsisoqatilik iluanaaruteqarnerpaavoq.

Royal Greenlandimi aqutsisut 2017 ima isertitaqarput:

Pisortaaneq Mikael Thinghuus: 4.323.000 koruunit

Aningaasaqarnermut pisortaq Niels Duus Kinnerup: 2.760.000 koruunit

Tuniniaanermut pisortaq Bruno Olesen: 2.606.000 koruunit

Tunisassiornermut pisortaq Lars Nielsen: 2.606.000 koruunit

Pitsaasumik ingerlatsivimmik ingerlatsineq

Påskip nalaani “Ingerlatseqatigiiffinnik aqutsilluarnissamut najoqqutassiat” Namminersorlutik Oqartussanit suliaasoq, inuiaqatigiit akornanni tusatsiakkat annikillisarnissaat anguniarlugu ingerlatseqatigiiffiit ataasiakkaat ammanerusumik aqutsinissaat, Sermitsiaq.AG-mit sammineqassaaq.

Namminersorlutillu Oqartussat innersuussutaat siulersuisunit arlalinnit angujuminaatsinneqarpasippoq.

Allaaserisani sammineqartuni pisortaanerit akissarsiaat Sermitsiaq.AG-mit sammineqassanngillat.

Ukiumut nalunaarutini 2.774.000 koruuninik bonusinik tunniussisaqarsimanera taamaallaat paasissutissiarineqarpoq.

Aqutsisullu akornanni qanoq bonusinik agguaassisoqarsimanera paasissutissiarineqanngilaq.

Aammattaaq aqutsisut ukiumut aningaasarsiaat utoqqalinersiartaqassanersut nalunaarutigineqanngilaq. Soorlu biileqartitaaneq, ineqartitaaneq allallu ersarissumik paasissutissiarineqarsimanatik.

Kina tullertut inissisimanersoq nalunartoq

KNI-p pisortaanera Peter Grønvold Samulsen tullertut inissisimavoq taanna aalajangersimasumik utoqqalinermusiassallu ilanngutereerlugit 3.175.000 koruuninik akissarsiaqarpoq 2017-imilu saniatigut 263.000 koruuninik iluanaaruteqarsimalluni. Taamaalilluni 3.438.000 koruuninik isertitaqarsimalluni.

KNI-milu pisortaaneq ilumut allattorsimaffimmi tullertut inissisimanersoq qularnarpoq, tamatumunnga pissutaavoq Royal Greenlandimi bonusinik agguaassisarnerit assigiinngissutaarsinnaammata. Assigiimmimmi agguaanneqartanngippata KNI-mi pisortaaneq Royal Greenlandimi aqutsisuinit pingasut ilaannit qaangernerneqarsinnaavoq.

Ersarissumik nalunaarsuineq

Pingajuattut inissisimasoq tassaavoq Tele Greenlandip pisortaanera Kristian Reinert Davidsen, taassuma ukiumu akissarsiat, utoqqalinersiassat, bonusit allallu tamaasa ilanngutereerlugit 2017-imi 3.393.000 koruuninik isertitaqarpoq. Ukiumut nalunaarutini pisortaanerup isertitarisimasai ersarilluinnartumik tamaasa paasissutissiarineqarsimapput. Assersuutigalugu paasissutissiarineqarpoq, biileqartitaanera, internetteqartitaanera, oqarasuaateqartitaanera, angalasinnaatitaanera kiisalu ineqartitaanera taakku 137.000 koruuninik naleqarput.

Sisamaattut inissisimangunartoq tassaavoq Royal Arctic Line-p pisortaanera Verner Hammeken, taanna 2017-imut ukiumoortumik nalunaarusiami ima naatsumik oqaasertalerneqarsimavoq:

“Aqutsisoq: 3.060.000 koruunit.”

”Direktion: 3.060.000 kroner.”

Tassa Verner Hammeken arlaatigut iluanaarutinik akissarsiaanut qaffassaataasinnaasunik paasissutissanik allassimasoqanngilaq.

Siulersuisuni siulittaasoq

Umiarsuaatileqatigiiffimmi aqutsisut akissarsiaat sooq annertunerusumik paasissutissiarineqarsimannginnerat pillugu RAL-imi siulersuisuni siulittaasoq Ulrik Blidorf Sermitsiaq.AG-p aperaa. Namminersorlutik Oqartussat ingerlatseqatigiiffiini ingerlatsilluarnissaq pillugu arlalinnik apeqquteqarsimavugut.

“Ileqquusumik ataatsimeersuarnissaq ulloq 1. maj 2019 ingerlanneqarnissaa aalajangiunneqarsimavoq. Ingerlatseqatigiiffinnik aqutsilluarnissaq pillugu najoqqutassiat siulersuisunit oqaluuserineqarnissaa aalajangiunneqareerpoq.

Umiarsuaatileqatigiiffiulli 2018-imut ukiumoortumik nalunaarusiani aqutsisut akissarsiaannik qanoq agguaassisoqarsimaneranik isertuussisoqarnissaa ilimanaateqareerpoq, naak tamanna Namminersorlutik Oqartussat innersuussutaannut akerliungaluartoq.