Skip to main content

Allatta 2040

Inuusuttunut oqaluttualiornermik unammisitsineq sapaatip-akunnerani uani aallartinneqarpoq - tamatumuuna inuiaqatigiit 2040-mi qanoq isikkoqarnissaat pineqarluni

"Nuna nunarsuarmi aatsitassarsiorfiunerpaaq, nuna eqqissisimatitaq inunnit tikinneqanngisaannarsimasunik avatangiisilik imaluunniit  nuna sermersuaarunnermigut portusigaluttuinnartoq? Kalaallit Nunaat 2040-mi nuna qanoq ittuussanersoq nalunarluinnarpoq, periarfissallu kisissaanngillat. Pissutsit qanoq innissaat takorlooreersinnaaviuk? 15-it 25-llu akornanni ukioqarpit? Taava Allattami unammeqataagit." Oqaluttualiornermik unammisitsineq Allatta 2040, NAPA-mit, Nunatta Atuagaateqarfianit, Sorlammit aamma milik publishingimit oktobarip aallaqqaataani aallartinneqarmat kaammattuut taama nipeqarpoq. Unammisitsineq 15-iniit 25-nut ukiulinnut sammisuuvoq. 

Tamatumuuna qulequtarineqassaaq 2040, siunissaq maanna inuusuttuusunut ungasippallaanngitsoq, aaqqissuisunit tusagassiorfinnut nalunaarummi atuarneqarsinnaavoq.

Atuakkiortut inuusuttut soqutiginnittut oqaluttualiaminnik allatta@napa.gl-imut novembarip 15-ia 2014 nallertinnagu nassiussissapput.

-Ukioq 2040 siunissamiippoq, siunissarlu tassaavoq inuusuttut namminneq sunniuteqarfigisinnaasaat. Inuusuttut oqaluttualiaat atuaganngorunik atuagaq tassaassaaq, ullutsinni inuusuttuusut siunissamik qanoq ittuunissaannik takorluugaannik immaqartussaq, unammisitsisut naliliipput.

Norgemiu atuakkiortoq Gro Dahle (Nunani Avannarlerni Siunnersuisoqatigiit meeqqanut inuusuttuaqqanullu atuakkiortunut nersornaasiuttagaannik Norgemi nersornaaserneqartussatut innersuunneqartut ilaat) Sisimiuni, Aasianni Nuummilu ilinniarnertuunngorniarfinnut sapaatip-akunnerani qaangiuttumi angalavoq inuusuttunullu allannissamut isumassarsiortitsisuulluni, Lene Therkildsen milik publishingimeersoq ilisimatitsivoq.

Naliliisussat tassaapput atuakkiortoq Jessie Kleemann, Ilisimatusarfimmi ilinniartitsisoq Birgit Kleist Petersen, Kalaallit Atuakkiortuni ilaasortaq Hans Anthon Lynge aamma Allatta 2012-imi ajugaasut ilaat aamma atuakkiortut peqatigiiffianni siulersuisunut qinigaaqqammersoq Sørine Steenholdt.

Nalilersukkat akornanni allalluagaanerpaat qulit toqqarneqassapput, tamarmik immikkut 2.500 koruuninik akissarsisinneqartussat. Nuummi naapeqatigiisinneqassapput allataminnik inaarsaaqatigiissallutik, kingorna atuakkiaat saqqummersinneqassaaq aamma Reykjavikimi 2015-imi ukiakkut pisussami allannermut pikkorissartitsinermut peqataassallutik Mette Moestrup aamma Gro Dahle pingaarnertut ilinniartitsisoralugit.

-Allattami peqataanikkut ilikkagaqaqaanga, pingaartumik atuakkiornerup silarsuaata qanoq inneranik. Aju-gaanerma sapiinnerulersippaanga allaat allanninni aningaasarsiassannik Namminersorlutik Oqartussanut qinnuteqarama akuerineqarsinnaasimallunga, oqaluttuaaqqallu allatakka aappaagu saqqummissapput, Sørine Steenholdt nuannaaqisoq tulluusimaaqisorlu oqarpoq. Sørine Steenholdt oqaluttualianik unammisitsinermi kingullermi  ajugaasut qulit ilagaat, tassaallunilu peqatigiiffimmi Kalaallit Atuakkiortuni ataatsimeersuaqqammersuni siulersuisuni nutaatut qinigaasut ilaat.

Peqataasunut soqutiginnittunullu Facebookimi quppernermik pilersitsisoqarsimavoq Allattamik taaguutilimmik.

Tassani ilaasortanngortoqarsinnaavoq oqaluttualiariniakkamullu atatillugu uparuaanerit, nersualaarinerit siunnersuutillu pineqarsinnaajumaarlutik.

Oqaluttualiat ataatsimut atuaganngortinneranni titartagartalersuisuussapput ilinniartut ukunaniittut: GU’t sisamat, GUX aamma Ilinniarfissuaq. Atuagaq saqqummeruni tassaassaaq inuusuttut siunissami kulturissaannik oqaluttuartussaq. Allattamut aningaasaliisuupput: Nunafonden, NAPA aamma milik, tusagassiorfinnut nalunaarummi taama allassimasoqarpoq.

Inuusuttunut atuakkiat

Allatta 2040-mi kalaallit inuusuttut takorluukkersaarsinnaanerat unammillerparput, neriuppugullu atuarumassusaat siuarsarsinnaallugu. Tamatuma peqatigisaanik atuakkianik inuusuttut inuunerannik ersersitsisunik saqqummersitsisarneq siuarsarniarparput. Inuusuttunut kalaallisut atuakkiat nutaat, nunani avannarlerni oqaatsinut nutserneqartussat, tamatuma peqatigisaanik Nunat Avannarliit sinnerinut killeqarfiit akimorlugit ataatsimooqatigiinnermik pilersitsisinnaapput, taamaalillutillu inuusuttut namminneq kulturiminnut tarrarsorsinnaalissallutik, unammisitsinermik aaqqissuisut unammisitsinermut paasissutissani tunuliaqutaasuni ilisimatitsipput.

Unammisitsineq nutaaq Allattap, Kalaallit Nunaanni inuusuttuunerup, Nunarsuarmi inuusuttuunerup 2013-imeersup, nanginneraa. Inuusuttunut 15-it 25-llu akornanni ukiulinnut 2040 qulequtaralugu oqaluttualiornermik unammisitsisoqaqqilerpoq.

Kalaallit Nunaanni atuakkiornermik ilinniarfeqanngimmat Allattamik suliniut nuna tamakkerlugu atuakkiortussamaatinut inuusuttunut kaammattuutitut atuutissaaq.

Nuummi sungiusaqatigiittoqarnerani oqaluttualiat ajugaasut qulit suliareqqinneqassapput tamatumalu kingorna kalaallisut/qallunaatut ataatsimoortunngorlugit saqqummersinneqassallutik tamatumalu kingorna nutserneqarlutik kalaallisut/norskisut saqqummersinneqassallutik. Oqaluttualiat nutaatut immiussanngorlugit KNR suleqatigalugu saqqummersinneqassapput kiisalu e-bogitut, inuusuttut oqaluttualianik qarasaasiaaqqaminni smartphonesiminniluunniit toqqaannartumik atuarsinnaaqqullugit.

Unammisitsineq atuakkkamillu saqqummersitsineq KNR suleqatigalugu immiussamik, e-bogimillu saqqummersitsinermik Islandimut nunat tamalaat akornanni atuakkialerinermik festivalip ilaatut nunani avannarlerni atuakkiortut workshoppernerannut isumassarsiorluni angalanermik malitseqartinneqassapput. Oqaluttualiat ilaasa Nunatta Isiginnaartitsisarfia suleqatigalugu isiginnaagassianngortinneqarnissaat aamma pilersaarutinut ilaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER