Allasiorneq inerteqqutaavoq
Qanga angutit Europamiut katikkusuttut atsiortinneqartarput nuliamik saniatigut arnanut allanut arneriniartassanngitsut – aammalu Kalaallit Nunaannit aallanngisaannassasut.
Aviisimi AG-mi sapaatip akunnerani matumani saqqummersumi allaatigineqarpoq nunasiaanerup nalaani ukiuni untritilinni marlunni avittoqarsinnaasimanngilaq, qangali suli sukannernerusunik malittarisassaqarpoq, aappariinnerup innarligaassaanngissusianik qulakkeerinnittumik. Aviisi AG allappoq.
Ph.d.-tut soraarummeerummini Ilisimatusarfimmi instituttimi pisortap Inge Høst Seidingip qanga kalaallit allamiunut katittarnerat (1750-imiit 1850-imut) misissuiffigisimavaa, ilaatigullu paasisimava angutit qallunaat norskillu nunatsinnut suliartortut, kalaallimut arnamut katinnginnerminni isumaqatigiissummik atsiussasut, tassuunakkut imminnut pisussaatillutik allanik atoqateqartassanatik, silaarullutik imertassanatik Kalaallillu Nunaannit aallanngisaannassallutik.
Pingaartumik malittarisassaq kingulleq amerlanerpaanut nangaanartoqartinneqarsimassaaq. Soraarummeerutip qulequtaraa »Married to the Daughters of the Country«.
- Allaammi qallunaat angutit, taamani kalaallimut arnamut katittut, Danmarkimi katissimasuugunik aappariinnermut qilersorsimanerusimapput. Tassami nuleersimanngikkunik Kalaallit Nunaat qimassinnaanngilaat, nuleersimallutillu qitornaqarunik aatsaat tamakkua inersimasunngoreerpata imminullu pilersorsinnaalereerpata aallarsinnaallutik, Inge Høst Seiding nassuiaavoq.