Skip to main content

Allarsuaq timmisartup minnerani aporneqarsimasoq

Boeing 737 Alaska Airlinesimeersoq, arfininngornermi sapaatip akunnerata siuliani Alaskami Yukutatip mittarfianut mimmat allarsuaq aportikkami ingerlannaartumik toqusimavoq. Mittarfeqarfiit nannut Kalaallit Nunaanni mittarfiit eqqaaniittut eqqumaffigilluartarpaat.

Alaska Airlinesip timmisartuutaata mittarfimmi sulisut attaveqarfigisimatsiarai, timmisartumi aquttup malugisinnaasimavaa, timmisartoq 60 tonsinik oqimassusilik arlaannik eqqugaqartoq.

Timmisartup terminalimut ingerlanneqarnera ajornartorsiutaasimanngilaq, apuummalli takuneqarsimavoq timmisartup motooria saamerleq ajoqusersimasoq, allarsuarlu arnaviaq mittarfimmi toqungasoq nassaarineqarluni. Ajutoorneq pisimavoq unnukkiartulersoq nalunaaqutaq arfineq-marluk qeqqata missaani, tamatuma nalaani mittarfik taarsereersimavoq, timmisartumilu aquttup allarsuaq ukiut marluk missaannik pisoqaassusilimmik piaralik takusinnaasimanngilaa, piaraa ajoqusersimanngitsoq qimaasimavoq.

Taamatut allappoq nittartakkakkut tusagassiivik The Aviation Herald, tusagassiivimmit timmisartup allarsuarmik apuisimaneranit motooriata saamerliup ajoqusersimanera assiutigaa.

Kalaallit Nunaanni ukiut 30-t ajutoortoqarsimanngitsoq

Mittarfeqarfinni ingerlatsinermut pisortap Niels Grosenip ilisimatitsissutigaa, ingerlatseqatigiiffiup ukiut 30-t atuussimanerani nannunut, tuttunut umimmanulluunniit tunngatillugit ajutorsimaneranik nalunaarsuisoqarsimanngitsoq.

- Tassa timmisartut, qulimiguullit, biilit inuilluunniit eqqarsaatigalugit, Niels Grosen oqaluttuarpoq.

- Qaqutiguinnaq uumasut miluumasut angisuut mittarfitsinniittut takuneqartarput. Kangerlussuarmi mittarfik ukiut 20-t matuma siornatigut ungalulerneqarmalli tuttunik umimmannilluunniit mittarfimmiittoqarsimanngilaq. Ilulissani qimmit qimuttut qaqutiguinnaq mittarfimmut pisarput, mittarfeqarfimmi pisortaq oqaluttuarpoq.

Uumasoq allarluinnaq Nerlerit Inaanni sulisut ilaannut tupigusutsitsisimavoq, ullaakkut misissuinermi puisi ataaseq mittarfimmiittoq takuneqarsimagami, allalu napasuliap saavani takuneqarsimalluni.

- Puisit taakku suaasalerlugit nerisassiarineqarsimapput, Niels Grosen ilisimatitsivoq.

Nannulli qaqutiguinnaq Kalaallit Nunaanni mittarfiit ilaasa eqqaanut pisarput.

- Kulusuup aamma Nerlerit Inaata mittarfiinut ukiut arlallit allortarlugit nannut takkuttarput. Qaanaami timmisartoqarfinniluunniit allani timmisartoqarfiit ammaneranni nannunik takusaqartoqaneq ajorpoq. Ukiut arlalialuit matuma siornatigut nanoq ataaseq Narsarsuarmi mittarfimmiittoq takuneqarsimavoq, Niels Grosen qulimiguullit Narsarsuup eqqaanitnannunik naapitaqartarlutillu takusaqartarsimasut pillugit oqaaseqartoq ilisimatitsivoq.

Nakkutiginnittoqartartoq

- AFIS-imik ingerlatsisutta timmisartunilu aquttutta suliassaasa pingaarnerit ilagaat mittarfinni timmisartoqarfiullu saavani, timmisartut milerneranni aallalernerannilu inoqarnersoq, uumasoqarnersoq timmiaqarnersorlu pillugu nakkutiginneqqissaarnissaq. Tunup avannaarsuani Tunumilu ulluunerani taamaallaat sulisoqartarmat, qaqutiguinnaq nannunik takunnittoqartarpoq, taamaattoqaraangallu malittarisassaat pingaarutillit isumagineqartarlutik, Niels Grosen nassuiaavoq.

Timmisartoqarfiit tamarmik ilinniarsimasunik sulioqarput, taakku aallaasinik timmiarsiutinillu kiisalu sakkunik qimaatitsiniarnermi atorneqartartunik assigiinngitsunik tigoriaannagassaqartinneqarput, mittarfimmit timmissanik uumasunillu qimaatitsiniarnermi atorneqartartunik.

- Air Greenlandip qulimiguuliutai marlussoriarlutik nannumik mittarfimmit qimaatitseqataasimapput, ingerlatsinermi pisortaq ilanngussilluni oqarpoq.

Ulorianarnerpaaq

Taassuma erseqqissaatigaa, apussallugit ulorinarnerpaasut tassaasut timmissat.

- Europamili Amerikamilu Avannarlermi paasissutissiissutigineqartartunut sanilliussigaanni, nunatsinni tamakkunannga apuisarneq qaqutigoortupilussuuvoq. Tamatumunnga atatillugu nerineqarsinnaasutut igitat, soorlu aalisakkerivinnit, piniariartarfinnit eqqaavissuarnilu igitat uumasunik timmissanillu nerineqartartut eqqumaffigilluartarpavut, ingerlatsinermi pisortaq ilisimatitsivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER