Allannermik unammisitsineq: Atuakkiortunngulersut nutaat

Allattap unammisitsinerani ajuaasut qulit toqqarneqarput. Maannalu atuakkiortutut sungiusartussanngorput.

Sørine Steenholdtip atuakkiortunngortussat siunnersorlugillu sakkussanik tuniorsassavai

Leiff Josefsen

Walter Turnowky

sisamanng 22. mar 2018 11:27

Annonse

Ajugaasut

Ajugaasut qulit

Oqaluttuaaqqat
Najannguaq Berthelsen, 18-nik ukiulik, Nuuk

Oqaluttuaaraq ”Atuaqatitaara” meerarsiamut tunngavoq, oqaluttuaaqqamilu sammineqarput kinaassuseq, kinaassusiiagaaneq, nunaqqatittalu allaanerusunit akuerinninnginnerannit isornartorsiunineq allallu.

Paninnguaq Møller, 28-nik ukiulik, Nuuk
Oqaluttuaaraq ” Nalujuakkat” inuunerup siunertaanik apeqqusiisumik ”inissaqartitsineq” sammineqarpoq, ilaatigullu sammisap pitsaanngitsortaa sammineqarluni; aappariinnermi imminnut inissaqartitsisoqarsinnaanersoq – aammalu inuiaqatigiinnit aqunneqarnerup aserorterinerata kingunerluutaanik isorinnilluni.

Navarana Lennert, 30-nik ukiulik, Nuuk
Oqaluttuaaqqami ”Inissaqartitsineq”-mi pinngortitaq sammineqarpoq; pinngortitap inissaqartitsiuaannarnera, ulluinnarni nuanniitsut, soorlu inuit nittartakkakkut attaveqatigiittarfiini pisut nuanniitsut alarlugit pinngortitamiinneq.

Onu Didriksen, 18-nik ukiulik, Nuuk
Oqaluttuaaqqami ”Inuunermi aallartinneq nutaaq”-mi isumakkeerinninneq saammasseqatigiinnerlu ilaatigut Onup sammivai. Qanoq ilaqutariit sequmikkiaartuaarsimanersut anaanaasup siusippallaamik toqunerata kingorna.

Erninnguaq Reimer, 29-nik ukiulik, Nuuk
Oqaluttuaaqqami ”Toqu akuersissummik pineq ajorpoq - Matup illua tungaani”-mi sammineqarpoq toqup inissaqartinnissaa, inuunermummi ilaammat.

Malik Sophus Schøller Jørgensen, 24-nik ukiulik, Nuuk

Maliup oqaluttuaaraliaani ”De Manglende Mellemrum”-mi apeqqutit inuunerup siunertaanik apeqqusiisut sammineqarput; uangaassuseq kinaanersoq, asanninneq suunersoq; apeqqutit sammiveqannginnermut, imminut sequtsernermut eqqaamasaarunnermullu tunngasut, kiisalu sammineqarlutik tunngavii ilisimanagit, kamanneq alisunnerlu.

Essay
Katrine Poulsen, 26-nik ukiulik, Nuuk
Katrinep oqaluttualiaaraani ”Eqqortoq?”-mi apeqquserneqarpoq ’ilumoortoq’ sunaanersoq; qanoq inummut ataatsimut eqqortoq, inummut allamut eqqunngitsuusinnaanersoq. Sammineqarputtaaq ilaquttaniit, ikinngutiniit atuarfimmiillu inuunermi sorusunnermik aalajangiisitsiniarsarinerit; nammineq allallu isumalluaataat sunnerneqartarnersut; imminut naakkiginnittutut inissisimaneq inuiaqatigiinnilu apeqqutit allat.

Tukumminnguaq Nykjær Olsen, 30-nik ukiulik, Nuuk
Tukumminnguup oqaluttuaaraliaani ” Piumassuserinngisaminnik tappiitsut”-ni sammineqarpoq inuiaqatigiinni avissaartuunneq; ilaatigut immikkoortitsinermik, oqaatsit pillugit oqallinnermik, kinaassuseq pillugu apeqqutinik tunngaveqartoq.

Ilusilersuilluni oqaluttualiat
Stine Buur Hvistendahl, 25-nik ukiulik, Nuuk

Taallami ” Manipuleret”-mi Stinep allaaserai asanninneq naalliuutaasoq, asanninnermiillu aserorterisumik iperaaneq.

Kaaleeraq M. Andersen, 25-nik ukiulik, Uummannaq
Kaaleeqqap taalliani ” Inooqataavunga”-mi sammineqarput qaangiinnagaaneq inuppalaarnerunerlu.

Inuusuttut qulit atuakkiortunngulersut maanna Niviaq Korneliussenip aamma Sørine Steenholdtip tumaat atuarnissaannut periarfissaqalerput. Taakkumi ukiormanna allannermik unammisitsinermi Allattami ajugaasuupput, atuakkiortut taakku marluk soorlu aamma siornatigut ajugaanikuusut.

Maanna pisut

Ukiormanna ‘inissaqartitsineq’ atuakkiortut neriulluartut sammisatut allaaserisussaanikuuaat.

- Allatarpassuit tigusagut takullugitqiimmallaataasimaqaaq, naliliisullu inuusuttunik toqqaanerminni assut ulapissimapput, Mia Skifte Lynge, Allatta! 3.0-mik ingerlatsisoq taama oqarpoq.

Naliliisuupput; siornatigut ajugaanikoq Sørine Steenholdt, ilusilersuisartoq Arny Koor Mogensen aammalu lektori Birgit Kleist Pedersen. Taakku peqatigiillutik allatat nassiunneqartut tamaasa atuarlugillu nalilersorpaat.

- Allatat ullumikkut nunatsinni pissutsinut pisunullu ersersitsisutut oqaatigineqarsinnaapput. Inuit soqutigisaannut, nuannersunut nuanniitsunullu. Allatani apeqqutit makku initupput: inissaqartitsineq qanoq isumaqarpa? Kimut? Immitsinnut allanullu naammattumik inissaqartitsivugut? naliliisut taama oqariartuuteqarput.

- Allatani sammineqarput inuunermik akisussaaffeqarneq, imminut, allanik pisimasunillu akuersineq, atugarlioraluarluni inuunermi ingerlariaqqinneq, tassa inuttut ajornartorsiornermiit pissusitoqqanik allannguineq. Toqqaanitsinni nutaalianik imaqarneq, oqaatsinik sannaanillu pinnguarneq atuagassiaqarnermut pitsaassutsimik qaffassaasut ukkataraagut.

– Tamatuma saniatigut sapinngisamik unammisitsinermi allattariaatsit tamakkerlugit toqqaaniarsarisimavugut

Pikkorissarneq

Inuusuttut 10-t maanna Tasiilami ullut sisamat allannermut pikkorissarnermi peqataasussanngorput, tassanilu Sørine Steenholdt nunallu avannarlerneersoq atuakkiortoq alla peqatigalugu allatatik sammissavaat. Utertitsivigineqassapput, siunnersorneqassapput, unamminermilu tunniussatik inerisaqqinnissaannut periarfissaqassallutik.

Allatat qulit ukiassariartulernerani milik publishingimit atuakkami ataatsimi katersorneqarlutik saqummersinneqassapput.

Septembarimi inuusuttut ilaatigut Islandimut Danmarkimullu nunani avannarlerni isumassarsiorlutik angalassapput. Ilaatigut Helsingørimi Kulturværftetimut peqataassapput, tassanilu nORD – Nordisk Litteratur festival ingerlanneqassaaq, aammalu nunani avannarlerni inuusuttut allattartut allat naapissallugit.

NAPA, milik publishing aammalu Kalaallit Atuakkiortut Nunattalu Atuagaateqarfia unammisitsinermik aaqqissuisuupput.

kulturi