UPS!

Allannerlugaq Post Greenlandip ajuusaarutigeqaa

Uummannaq qanormaanna allanneqartarpa? Allannerlutap kingorna kukkunersiuinermi akuersissuteqariaaseq nutaaq atorneqalissaaq, Post neriorsuivoq

Leiff JosefsenUummannap tunngavilerneqarnerminit 250-inngortorsiornissaanut nalliuttorsiornermi frimærki illoqarfiup aqqa kukkusumik allallugu naqiterneqarsimavoq. Frimærkimi illoqarfiup aqqa ´m´-imik amigaateqarpoq, Uummannaq allassimalluni ´Uumannaq´. Post

- Ajuusaarutigeqaara Uummannamut nalliuttorsiornermi frimærki allannera kukkuneqarluni saqqummermat.
Taamatut oqarpoq Postip frimærkinut pisortaa Allan Pertti Frandsen.
Taamatut ajuusaaruteqarneranut pissutaavoq nalliuttorsiornermi frimærki, Uummannap 250-inngortorsiuinissaanut saqqummersinneqartoq, illoqarfiup aqqanik kukkusumik allanneqarluni saqqummersinneqarmat. Frimærkimi illoqarfiup aqqa kukkusumik allanneqarsimavoq, tassa Uummannaq allanneqarsimammat ´Uumannaq´.
Frimærki juunip 11-anni saqqummersinneqartussaammat frimærki nunarsuarmi tamarmi frimærkinik tuniniaasartunut agentinullu nassiussuunneqareersimavoq.
- Taamaattumik ajoraluartumik frimærki utertinneqarsinnaanngilaq naqiteqqillugulu, Allan Pertti Frandsen tusagassiorfinnut nalunaarutikkut nassuiaavoq.
Sakkortusitsisoqassaaq
Taassuma oqaatigaa kukkuneq pisimasoq aali Post-imi kukkunersiukkat akuerineqarnissaannut periutsit tamarmik malinneqarsimagaluartut.
- Pisimasoq erloqinartorujussuartut isigaara. Taamaattumik Post Greenlandip frimærkinik saqqummersitasaanut tamanut akuersissuteqariaatsit nalilersoqqinneqassapput allanngortinneqassallutillu, taamaattoqaqqinnginnissaa qulakkeerniarlugu, Allan Pertti Frandsen oqarpoq.
Uummannap frimærkiata allannerata kukkunera takuuk allaaserisami qullerpaami assi normu 2 toqqarlugu

Powered by Labrador CMS