Allanik tunillatsittoqarsimanngilaq - laboratooria tamakkiisumik atorneqalerpoq

Naalakkersuisut Siulittaasuat Kim Kielsen aamma Nunatsinni Nakorsaaneq Henrik L. Hansen tallimanngornermi tusagassiortunik katersortitsinermi oqaluttuarput, nunami maani coronavirusimik allanik tunillatsittoqarsimanngitsoq.

- Piffisssami kingullermi allanik tunillatsittoqarsimanngilaq, taamaammat ulluinnarnut uteqqittoqarnissaa kissaatigineqaqaaq, sulili mianersortariaqarpugut, Kim Kielsen oqarpoq.

- Sapaatip akunnerani matumani arlalinnik iliuuseqarpugut, ilaatigut ilinniartoqarfiit ilaat, Nuuk Center ammarpavut, aamma Nuummi imigassanik nioqquteqarsinnaaneq ammaqqinneqarpoq, Kim Kielsen oqarpoq.

- Allanik tunillatsissimasoqartuuppat, taamaaliorsinnaasimanavianngikkaluarpugut. Upalungaarsimanerput iluatsissimavoq, Kim Kielsen oqarpoq.

Laboratooria nutaaq atorneqalersoq

Laboratoriamit COVID-19-imut misissuinerit maanna tamakkiisumik ingerlanneqalerput.

- Marloriarluta misissuissaarpugut, Nunatsinni Nakorsaaneq Henrik L. Hansen oqarpoq, nangillunilu:

- Laboratoriami atortut Kalaallit Nunaannukaannissaat pitsaasumik ingerlanneqarsimapput Kalaallillu Nunaanni peqqinnissaqarfimmi sulisut suleqatigalugit ingerlanneqalerluni. Atortut pingaaruteqartorujussuupput – innuttaasut tunillatsissimanerlutik sukkanermik akissutisinissaat kisiat eqqarsaatiginagu. Aammali nutaanik tunillatsittoqarsimatillugu sukkanermik iliuuseqarsinnaalissaagut tunillatsissimasullu sukkanermik attavigisinnaassallugit, Nunatsinni Nakorsaaneq Henrik L. Hansen oqarpoq.

Namminersorlutik Oqartussat tusagassiorfinnut nalunaarutaat naapertorlugu, manna tikillugu innuttaasut ullut marluk tikillugit COVID-19-imut misiligutit inerneri utaqqisarsimavaat. Maani laboratoriaqalernikkut misissugassat akissutaat innuttaasunut sukkanermik tunniunneqartalissapput, tassami misissukkat akissutaat ullormit ullormut tunniunneqarsinnaalissammata.

Laboratooriamut tunngatillugu paasissutissat

- Misissugassanik amerlasuunik suliaqarfiusinnaavoq pisariaqartinneqartunillu naammassisaqarsinnaanera naatsorsuutigineqarluni.

- Suliat immikkut ilisimasallit marluk Dronning Ingridip Napparsimmavissuani laboratoriami sulisut suleqatigalugit suliarineqarput.

- Immikkut ilisimasallit atortussat pisariaqartinneqartut nassarpaat.

- Laboratoriap maannamuugallartoq qaammatini marlunni ingerlanneqarallarnissaa isumaqatigiissutaavoq.

Paasissutissarsiffik: Namminersorlutik Oqartussat

Nunatsinnili nakorsaanerup qulakkiivillugu oqaatigisinnaanngilaa, Kalaallit Nunaanni tuniluuttoqarunnaavissimanrsoq, taamaammat malittarisassat ilaasa suli malinneqarnissaat pisariqarnerarpaa.

- Aamma oqaatigisinnaavara, suliami qanoq ingerlariaqqinnissatsinnut inassuteqaatit assigiinngitsut sulissutigalugit ulapilluta, Nunatsinni Nakorsaaneq oqarpoq.

- Kalaallit Nunaat immikkuullarissumik inissisimavoq. Nunarsuarmi nappaatip ilungersortitsinerani, maani uagut eqqissisimavugut, nakorsaaneq oqarpoq.

Nunap iluani angalaneq ammaqqinneqassasoq

Tallimanngornermiit apriilip 24-ani Kalaallit Nunaanni sumiiffiit ilaat angallaffiusinnaaqqilissapput, Kim Kielsen oqarpoq.

Tassa Qeqertarsuup Tunuani avannarpasinnerulaartumilu angalasinnaasoqaqqilissaaq, Kielsen nassuiaavoq. Kujataani illoqarfiit akornanni aamma angalasinnaasoqaqqilissaaq.

Kielsenip ilisimatitsissutigaa, allanik ammaaqqinnissamut tunngatillugu ataasinngorpat nutaarsiassanik saqqummiusisoqarumaartoq.

Naalakkersuisut Siulittaasuata tusagassiortunik katersortitsineq naggaserlugu inuttaasut qujaffigai:

- Innuttaasut qujaffigerusuppakka, taakkuummatami maangarujuk pisimanitsinnut pisuusut. Nammineerlunga aamma uanga nalinginnaasumik atugaqaqqilernissatsinnut qilanaarpunga. Qujanaq pisortat inassuteqaataannik malinnikkassi, immissinnullu paarilluarisi, Kielsen oqarpoq.