Allakkiaq: Meeqqat atornerlunneqarsimasut katsorsarneqanngitsoortarput

Kalaallit qallunaallu isumaginninnermik suleqatigiinneranni suliniutit arlallit ajornartorsiorfiupput.

Suliniutit ilaanni meeqqanut inuusuttunullu atugarliortunut, kinguaassiutitigut atornerlunneqarsimasunut katsorsaanissamik neqeroorutaavoq.

Meeqqanik katsorsaasut angalasartunik taaneqartut katsorsaasarput, kisianni angalasartut meeqqat katsorsarneqartussat pillugit suliat tunniunnissaat unammillernartoqartippaat. Ajornartorsiut kommunini sulisussaaleqinermik pissuteqartoq, tassani nalilerneqarpoq.

Ilutigitillugu katsorsaanerit naammassigaangata inaarutaasumik nalunaarusiarineqartut kommuninit tamanit malitseqartinneqarneq ajorsimapput:

Paasissutissat pingaarutillit ingerlateqqinneqartanngitsut

- Tamatumalu ilaatigut nassatarisaanik meeqqat ilai katsorsarneqaannartussat malitseqartitsivigineqartussalluunniit pisariartinneqartumik katsorsarneqarsimanatik malitseqartitsivigineqarnatillu, killiffik pillugu allakkiami tamanna allaqqavoq, taanna Folketingimi Nunarput pillugu ataatsimiititaliamut nassiunneqarpoq.

Allakkiami aamma allaqqavoq ”sullitat pillugit paasissutissat pingaaruteqartut oqartussaasunit meeqqanik katsorsaasut angalasartuni tarnip pissusaanik ilisimasalinnut ingerlateqqinneqartannginnerat misigineqartarpoq, tamannalu katsorsaanerit ingerlanneqarnerannut toqqaannartumik sunniuteqarluni.”

Allakkiaq naapertorlugu suliniutinit 11-nit arfinillit naatsorsuutigineqartumik siumut ingerlapput, tallimallu ajornartorsiorfiullutik.

2023-mut ingerlasoq

Suleqatigiinneq qulequtaqarpoq: Kalaallit Nunaanni meeqqanut inuusuttunullu atugarliortunut pitsaanerusumik suliniuteqarnissaq pillugu kalaallit qallunaallu oqartussaasoqarfiisa assigiinngitsunik suliallit akornanni suleqatigiinneq. Taanna Kalaallit Nunaata upernaakkut 2019-imi qinnuiginninnerisa kingorna aallartinneqarpoq.

Danmark suliniummut 80 mio. kr.-inik aningaasaliivoq, Kalaallit Nunaallu 20 mio. kr.-inik tapiissuteqarpoq.

Killiffik: Kujataani meeqqat pillugit nalunaaruteqartarnerit marloriaataat sinnerlugit amerlisimasut

Suliniut 2020-2023-mi ingerlassasoq pilersaarutigineqarpoq, taannalu suliniutinik 16-inik meeqqanut atugarliortunut ikiuisussanik imaqarpoq.

Suliniutit tallimat Danmarkimi Justitsministerietimit naammassineqarput. Uku pineqarput:

• Meeqqanik kinguaassiuutitigut pinngitsaaliilluni kujannittoqarsimatillugu allatulluunniit atoqateqartoqarsimatillugu suliani sakkortuumik pineqaatissiisarnerup sivitsorneqarnissaanik innersuussut.
• Kalaallit Nunaanni Politiini immikkoortortamik meeqqanut kinguaassiuutitigut atornerluinernik akiuinermik suliaqartussamik pilersitsinissamik innersuussut.
• Nuummi Pineqaatissinneqarsimasunut Inissiisarfimmi katsorsagassanut inissanik pilersitsisoqarnissaanik innersuussut.
• Kalaallit Nunaanni kinguaassiuutitigut pinerluuteqarsimasutut pineqaatissinneqarlutik Pinerluttunik Isumaginnittuni inissinneqarsimasut iliuuseqarfiginissaannut pilersaarummik pilersitsisoqarnissaanik innersuussut.
• Kalaallit Nunaanni Pinerluttunik Isumaginnittut Katsorsaanermut attaveqaqatigiinnut ilanngunneqarnissaannik innersuussut