Allakkerisarneq nutaamik taaguuserneqarlunilu nutaamik pisortartaassaaq

Tele-Postip allakkerisarnermik allannguinissamut pilersaarutaata malitsigisaanik, Allakkerisarnermut taaguut Digitalikkut Niuernermut, pilersaarusiornermut aqutsinermulllu allanngortinneqarpoq, tassungalu atatillugu immikkut piginnaasalimmik pisortassarsiortoqarluni.

Tele-Postip atorfimmik inuttassarsiuussineq aqqutigalugu allakkerinermi pisortaasimasoq Per Svendsen paarlatsissarsiorpaa, tassani erseqqissumik takuneqarsinnaavoq, Namminersorlutik Oqartussat ingerlatseqatigiiffiutaata ukiunut tulliuttunut sisamanut periusissiassamini allakkerisarnermik allanngortitsiniarnera.

Digitalinngorsaaneq atuisullu pisariaqartitaat niuernermut kiisalu pilersaarusiornermut aqutsinermullu piumasaqaatinik nutaanik nassataqartut, atorfimmik inuttassarsiuussinermi allassimavoq.

- Taamaattumik Digitalikkut Niuernermut, pilersaarusiornermut aqutsinermullu pisortassatsinnik nutaamik ujaasivugut, sulisut 100-t missaanniittut peqatigalugit Kalaallit Nunaanni atuisunut tamanut pisianik poortukkanillu assartuinermut akisussaaffeqartitassatsinnik. Nuieqatigiinnissamut nutaanik periarfissaqalersitsinissaq Kalaallit Nunaannillu Nunarsuup sinneranut ammaasinissaq pisortap aamma akisussaaffigissavaa, atorfimmik inuttassarsiuussinermi allassimavoq.

Ukiut digitalinngoriartorfiusut

TELE-POST-imi Allakkeriveqarfiusimasunngortussaq pisortaaffigissavat digitalinngorsaanermillu qulakkeerinneqataanerpit saniatigut allakkerinermik, pilersaarusiornermik aqutsinermilllu suliaqarfiit aammalu frimærkit ukiunut digitalinngoriartorfinnut naleqqussarlugit ineriartortitseqataaffigissavatit, Tele-Post allappoq.

Pisortassaq naapertuuttumik ilinniagaqarsimassaaq digitalillu periarfissiineranik paasinnissinnaassuseqassalluni, aamma takorluuisinnaassusilimmik niuertorpalaartumik eqqarsartaasilimmik aaqqissuussaasumillu suleqatiginnikkumassuseqassalluni, ”Kalaallit Nunaanni pisisartut nioqqutissanut amerlanerusunut ajornannginnerusumik sukkanerusumillu pissarsisinnaalernissaat anguniarlugu”.

Digitalikkut Niuernermut, pilersaarusiornermut aqutsinermullu pisortaq TELE-POST-imi aqutsisoqatigiinnut peqataassaaq, suliffeqarfiullu pisortaaneranut Kristian Reinert Davidsenimut attaveqartassalluni.

Aamma atuaruk: Allakkerisarneq allanngortinneqassaaq

Powered by Labrador CMS