Nuuk
Allagartalersuinerup angalaarnissaq ajornaannerulersissagaa
Nuummi allagartat qalipaatigissut angalaarnissaq ajornaallisissavaat, Kommuneqarfik Sermersooq paasissutissiivoq
Illoqarfiit pingaarnersaanni Nuummi angalaarnermi kukkusumik ingerlarsarneq qaangiuttussanngorpoq, Kommuneqarfik Sermersooq nittartakkamini paasissutissiivoq.
- Najugaqartunit takornarianillu arlalinnit – sumiiffissarsiorniarluni sumiiffimmullu aalajangersimasumukarniarluni allagartamik ujarleraluarluni nassaangitsornerup pilersitaanik uumisunnernermik misigineq ilisarisineqarsinnaassaaq. Allagartanik, sumiissusersiuutinik paasissutissanillu amigaateqarsimavoq, Kommuneqarfik Sermersooq allappoq.
Qalipaatinut immikkoortiterineq
Allagartat nutaaffaariit erseqqarissunik isumaliortaatsimut naleqquttunik ilusilersugaannerisa siunissami illoqarfiup iluani angalaneq ajornaallisissavaa oqinnerulersillugulu. Nuuk, Nuussuaq aamma Qinngorpumiittut allagartat nutartissapput qalipaatinillu immikkoortitserneqassallutik, illoqarfinni sumiiffinni aqqutissiornissaq angalanissarlu ajornaallisillugu iluatsitiffiutillugulu.
Isumassarsiaavoq illoqarfiup allagartaasa sumiissusersiutillu paasinartut nunap assinga pingaarnerusuinnarnik nalunaarsuiffilimmut illoqarfik illoqarfiulluuniit immikkoortortaasa ataatsimut katitigaanerannut aqqutissiuisussaq, Kommuneqarfik Sermersooq allappoq.
Nuannersumik nittarsaassineq
- Ilusilersueriaatsip nutaap, allagartallu nutaat paasissutissiisapput, aqqutissiuillutik illoqarfittullu pingaarnertut nittarsaatissalluta. Ullumikkut allagartalioriaaseqanngilagut aaqqissuusamik, naammaginartumik paasissutissiisumik tamannalu Nuummiittunut tamanut naammaginanngilaq illoqarfittullu pingaarnertut. Kissaatigaarput nuannersumik Nuuk, illoqarfiullu immikkoortui pingasut nittarsaanissaat.
Taama Sanarfinermut Avatangiisinullu Ataatimiititamut Siulittaasoq, Mille Søvndahl Pedersen (IA), oqarpoq.
Isumassarsiaq nutaaq siullerpaamik ukiup tulliani marsimi Arctic Winter Gamesertoqarnerani misilinneqassaaq. AWG sioqqullugu, ingerlanerani kingornalu immikkuullarissunik allagartalersuinerit illoqarfiup assiliartaanut ilanngunneqassapput.
Allagartat siulliit septembarimi oktobarimiluuniit ikkussorneqarnissaat naatsorsuutigineqarput.
Allagartalersuinissamut pilersaarusiaq takusinnaajumallugu ilanngussaq talerpiup-tungaaniittoq tooruk.
Aamma atuakkit:
Sermersuumi eqqaaveqarnerulissaaq
Kunngissap Arctic Winter Games nittarsaatissavaa