matoqqaneq
Allagaatinik takunninniarneq unitsinniarlugu GME-p sakkussat tamaasa atorpai
Namminersorlutik Oqartussat siullermik GME-mi avatangiisinut sunniutaasinnaasunik nalilersuineq (VVM) pillugu nalunaarusiaq allagaatinik takunnissinnaateq malillugu akuerineqarpoq, taava takunnissinnaatitaaneq atorunnaarsippaat naggataatigullu suliaq pillugu kikkunnut tamanut saqqummiussinissaq itigartitsissutigimmassuk aatsitassarsioqatigiifik sulisut ulappuserput.
Greenland Minerals and Energymit (GME) mailikkut oqaatsit kamappaluttut kingunerisaannik Namminersorlutik Oqartussat DR aamma AG aatsitassarsioqatigiiffimmi avatangiisinik misissuinerugallartut pillugit allagaatinik takunnissinnaanerat pillugu aalajangernertik killormut saatseriasaarpaat.
Taamaattoqarnera, allagaatinik takunnissinnaatitaanermik itigartitaaneq pillugu aviisimit naammagittaalliortoqarnerani, Naamminiilivinnissamut, Pinngortitamut, Avatangiisinut Nunalerinermullu Naalakkersuisoqarfimmit suliassami allagaatit arlalippassuit AG-mut takutinneqartut takutippaat.
Aamma atuaruk: GME-p suliniutaanut avatangiisinut sunniutinut nalunaarusiaq AG-mit takoqqusaanngitsoq
Allagaatit tassaanerupput aaatsitassat pillugit avatangiisinik aqutsisoqarfiup suliassamilu illua´tungiliuttut, ilaatigut GME, akornanni emailikkut attaveqaqatigiittarnerit. Siorna septembarimili siullermik GME-mi DR-ip allagaatinik saqqummiussinissaa akerlerineqalerpoq.
- Allagaatit avatangiisinut sunniutaasinnaasunik nalilersuinerugallartumut tunngasut DR Nyheder-imut tunniunneqarnissaat sakkortunerpaamik akerleraarput. VVM pillugu nalunaarusiaagallartoq suliffeqarfiup iluani papilissatut isigineqassaaq aamma oqartussaasuni suliarineqarnerani pisortatigoortumik akuerineqanngillat. Taamaattumk maannakkut sooq qanorlu tamanut saqqummiunneqassanersut paasisinnaanngilarput, pisortaq, John Mair tusarniaassummut akissuteqaammi allappoq.
Oktobarip sisamaanni allagaatinik tamanik tamakkiisumik takunnissinnaattsissut tunniunneqarpoq, ftp-serverimik taaneqartumut ilanngunneqartoq, tassanilu DR-imi tusagassiortup Morten Frandsen aasinnaasimavaa.
Aamma atuaruk: GME: Uranimik piiaaffik uloriananngilaq
VVM pillugu misissuinerugallartoq nalunaarusiallu ilai ataasiakkaat aavai, avatangiisillu pillugit suliniaqatigiiffimmut NOAH-mut suliniutip imminut illersorsinnaaneranik nalilersuiffigeqqullugu tassunga ingerlateqqillugu.
Sinneri uninngatiinarpai, suallaqaamitaava. Tassami DR aamma allagaatinik tamanik takunnisinnaatitaasoq GME ilisimatinneqarsimavoq. Tassanngaannillu kamattoqalerpoq.
Aamma atuaruk: Isertortumik uranisiornermut nalunaarusiaq saqqummiunneqarpoq
- Allakkianik 1-imiit 73-imut (…) tamanut saqqummiussinissarsi GME-imit sakkortunerpaamik akerliuffigaarput aammalu allakkiat tamanut saqqummiunneqarnissaat pillugu aalajangerneq ingerlaannaq tunuartissagissi assilisallu (kopiit) tamaasa utertitsillugit, aamma (2) GME-p allakkianik tamakkuninnga pigginnittuuneranik kisermaassillunilu piginnittuuneranik illersorneqarnissaanut naammaginartunik tamanik iliuuseqarlusi, pisortaq, John Mair aatsitassat pillugit avatangiisinik aqutsisoqarfimmut allappoq.
Aamma atuaruk: Marraap radioaktiviusup sisunissaa ilisimasallip ernummatigaa
GME-p maalaaruteqarnerata aatsitassat pillugit avatangiisinik aqutsisoqarfiup suliap ingerlanneqarnerani allagaatinik takunnittoqarsinnaajunnaartippaa.
Februaarip qiteqqunnerani aqutsisoqarfiup atortussap ilaanik allagaatinik takunnitsitsiniarluni aaqqiivoq. Pisut akornanni AG aamma allagaatinik takunnikkumalluni noqqaanikuuvoq.
Aatsitassat pillugit avatangiisinik aqutsisoqarfiup isumaa sooq allanngorsimanersoq atuarneqarsinnaanngilaq, kisianni marsip aallaqqaataani AG-mut DR-imullu allagaatinik takunnikkumanninnermut itigartitsivoq.
Aviisimi AG-mi paasisaqarnerugit, pisut pillugit tassani erseqqarinnerusumik nassuiaasoqarpoq, uani linki atorlugu atuarsinnaavat: